KAMATI YA NIDHAMU YA TFF YASHUSHA RUNGU ZITO KWA WALIOHUSIKA NA FUJOLIGI DARAJA LA KWANZA

KAMATI ya nidhamu ya Shirikisho la Soka Tanzania (TFF) imemfungia mechi 10 pamoja na faini ya Sh. 300,000 Kocha wa timu ya Polisi Tabora kwa kosa la kumtukana mwamuzi wakati wa mechi kati ya timu yake na Panone FC iliyochezwa mjini Moshi.

 
Maamuzi hayo yalitolewa jana baada ya kamati hiyo  kukaa Februari 3, mwaka huu na kusikiliza mashauri 12 na kuyatolea hukumu huku mengine yakiendelea kusikilizwa.

Akizungumza  Dar es Salaam jana Mkurugenzi wa Mashindano wa TFF Boniface Wambura alisema Kocha huyo Eliakim Christopher amefungiwa kwa mujibu wa kanuni ya 39(2) ya Ligi Daraja la Kwanza (FDL) baada ya kutiwa hatiani.

Mbali na adhabu ya kocha huyo, imewafungia mechi tatu pamoja na faini ya Sh. 300,000 wachezaji wanne wa timu ya JKT Oljoro kila mmoja.

Wachezaji hao Dihe Makonga, Swaleh Idd Hussein, Ramadhan Mnyambegu na nahodha Shaibu Nayopa wamekutwa na kosa la kuhusika na vurugu kwenye mechi dhidi ya Burkina Faso iliyochezwa Morogoro pamoja na kumpiga mwamuzi katika moja ya mechi yao ya Ligi Daraja la Kwanza.

Aidha, Mtunza Vifaa  wa JKT Oljoro FC, Eliud Mjarifu amefungiwa miezi sita na kupigwa faini ya sh. 200,000 kwa kumpiga Kocha wa Burkina Faso, CR Mwakambaya kwenye mechi kati ya timu hizo iliyofanyika Uwanja wa Jamhuri mjini Morogoro.

Pia, Mjarifu amepewa onyo kali na kutakiwa kutorudia tena kutenda kosa, kwani hata mwenendo wake wakati wa shauri hilo ulionyesha utovu wa nidhamu mbele ya Kamati.

Wengine waliofungiwa  mwaka mmoja ni viongozi wawili wa Chama cha Soka la Wanawake Tanzania (TWFA) Mkoa wa Mwanza kwa kuwashawishi wachezaji wa Mwanza Queens kugomea uamuzi halali.

Sophia Tigalyoma (Mwenyekiti) na Katibu wake Hawa Bajanguo walitiwa hatiani kwa kuwashawishi wachezaji kugomea uamuzi wa Kamati ya ya Soka la Wanawake (TFF) kutupa rufani yao dhidi ya Kigoma.

 Naye Mtunza Vifaa wa Rhino Rangers FC, Albert Mbuji amefungiwa miezi sita na faini ya sh. 200,000 kwa kupatikana na hatia ya kuwatukana na kugomea uamuzi wa marefa kwenye mechi dhidi ya Polisi Dodoma. Adhabu hizo zimetolewa kwa mujibu wa kanuni ya 40(2) ya FDL.

Wambura alisema Kamati hiyo pia imeondoa malalamiko dhidi ya Ofisa Habari wa Ruvu Shooting, Masau Bwire kwa vile refa Israel Mujuni Nkongo ambaye ni mlalamikaji hakufika kwenye shauri hilo.

Nkongo alimlalamikia Bwire akidai alitoa maneno yenye kuweza kuchochea chuki dhidi yake kwa waamuzi, kwani kupitia redio 100.5 Times FM, Bwire alidai refa huyo ndiye aliyeshinikiza kuondolewa kwa refa Mohamed Theofil kwenye ratiba ya Ligi Kuu ya Vodacom (VPL).

Pia, Kamati hiyo imemkuta bila hatia Kaimu Katibu Mkuu wa Chama cha Soka  Mkoa wa Singida (SIREFA), Gabriel Gunda ambaye TFF ilimlalamikia kuwa akiwa Mtendaji Mkuu wa chama hicho alishindwa kuhakikisha timu ya Singida inaingia uwanjani kucheza na Dodoma kwenye mechi ya Kombe la Taifa kwa Wanawake.

Kamati ilikubaliana na utetezi wa Gunda kuwa jukumu la timu hiyo lilikuwa mikononi mwa viongozi wa TWFA Singida, na tayari SIREFA kupitia Kamati yake ya Nidhamu ilishatoa adhabu kwa viongozi wa timu hiyo kutokana na kitendo hicho.

Nayo malalamiko ya Polisi Tabora FC kutaka mechi yao dhidi ya Toto Africans FC irudiwe kwenye uwanja huru  kwa madai ya kuchezeshwa zaidi ya muda unaotakiwa, na kutokuwepo ulinzi wa kutosha kwenye Uwanja wa CCM Kirumba jijini Mwanza yamekataliwa.

Pia, Kamati ya Nidhamu imeelekeza malalamiko ya timu za Mwadui FC na Polisi Mara FC dhidi ya Toto Africans kwa kumchezesha mchezaji Ladislaus Mbogo bila kuonyesha leseni yake yasikilizwe haraka na Bodi ya Ligi Kuu Tanzania (TPLB) kwa vile si ya kinidhamu.

Kamati hiyo iliendelea na kikao chake jana  kusikiliza malalamiko mengine ya kinidhamu yaliyofikishwa mbele yake.