DAVID MOYES ATEULIWA KUWA KOCHA MPYA REAL SOCIEDAD

KOCHA wa zamani wa Manchester United na Everton, David Moyes, ameteuliwa kuwa Meneja mpya wa Klabu ya La Liga huko Spain, Real Sociedad.
Moyes, mwenye Miaka 51 na ambae alifukuzwa kazi Man United Mwezi Aprili baada ya Miezi 10 tu kibaruani, amekuwa hana kazi tangu wakati huo.
Huko Real Sociedad Moyes anambadili Jagoba Arrasate aliefukuzwa Wiki 2 zilizopita baada ya matokeo mabovu ambayo yameifanya Klabu hiyo iwe Nafasi ya 15 kwenye La Liga.
Uteuzi huu wa Moyes umethibitishwa na Real Sociedad Jana jioni walipotoa taarifa kwenye Tovuti yao.
Moyes amesaini Makataba hadi Juni 2016 na Mechi yake ya kwanza kama Meneja ni hapo Novemba 22 watakapocheza ugenini Mechi ya La Liga na Deportivo La Coruna.
Moyes, ambae aliwahi kuwa Meneja wa Klabu za Preston Northend na Everton, aliteuliwa Meneja wa Man United mara baada ya Sir Alex Ferguson kustaafu Mwezi Mei Mwaka Jana baada ya kuiongoza Klabu hiyo kwa Miaka 26.
Hata hivyo, Moyes alitimuliwa Mwezi Aprili huku Man United ikiwa Nafasi ya 7 kwenye Ligi Kuu England na Mechi za Ligi zikiwa zimebaki 4 na akateuliwa Meneja wa muda Ryan Giggs ambae wakati huo alikuwa bado Mchezaji wa Klabu hiyo.

Akiwa Man United, Msimu huo uliopita, Moyes alikumbana na Real Sociedad kwenye Mechi za Makundi za UEFA CHAMPIONS LIGI na kushinda 1-0 Uwanjani Old Trafford na kutoka Sare 0-0 huko Spain.

Kwa Real Sociedad Moyes anakuwa Meneja wa nne kutoka Uingereza katika historia yao na wengine waliowahi kuongoza Klabu hiyo ni Harry Lowe aliekaa huko Miaka 5 kuanzia 1930, John Toshack aliekaa kwa vipindi vitatu tofauti na Chris Coleman alieteuliwa Julai 2007 na kudumu Miezi 7 tu.

Msimu huu kwenye Ligi, licha ya kusuasua, Real Sociedad tayari wamewafunga Vinara wa La Liga, Real Madrid, na Jumapili iliyopita kuwatwanga Mabingwa Watetezi Atletico Madrid Bao 2-1