WENGER AJITOA LIGI YA MABINGWA NA ROONEY HAJUI KAMA ATABAKI OLD TRAFFORD

 

LONDON, England

KOCHA wa Arsenal, Arsene Wenger, amesema Gunners wamepangwa kwenye kundi gumu na kuongeza kuwa itakuwa ngumu kwa wao kuweza kufuzu hatua ya makundi, kutokana na ubora wa timu zote nne.

Wenger, aliweka wazi kuwa kufuzu katika hatua hiyo itakuwa kazi ngumu na kuna uwezekano mkubwa wa kutolewa mapema.

Gunners walitarajiwa kuanza na Olympique de Marseille na kusema kuwa itakuwa ngumu kwa timu zilizopo kwenye kundi lao la F kuweza kunyakua pointi ugenini. Timu nyingine za Kundi F  ni Napoli na Borussia Dortmund.

@@@@@@@@@@@@

Rooney hajui kama atabaki Old Trafford

LONDON, England

PAMOJA na mshambuliaji wa Manchester United, Wayne Rooney, kufikisha mabao 200 kwenye klabu hiyo, lakini nyota huyo hajui hatima yake ndani ya Old Trafford.

Rooney alifikisha mabao hayo 200, baada ya kupachika mabao mawili katika mchezo wa Ligi ya Mabingwa ambao waliibuka na ushindi wa 4-2 dhidi ya Bayer Leverkusen.

Akiwa katika kiwango kizuri, Rooney aliisaidia United kwa kupachika mabao hayo mawili na kutengeneza bao la nne, ambalo lilifungwa na Antonio Valencia, wakati kocha mpya wa United, David Moyes, akipata ushindi wa kwanza katika Ligi ya Mabingwa.

Lakini, alipoulizwa na mtangazaji wa televisheni ya ITV, Gabriel Clarke, kama atabaki Old Trafford, baada ya tetesi nyingi za kuwa ataondoka, Rooney alijibu kwa ukali: “Sikiliza, ninaangalia masula yangu ya soka kama ambavyo nimekuwa nikifanya misimu yote.

“Nimejinyenyekeza ili niweze kufanya kazi kwa bidii na kujiweka fiti kwa ajili ya msimu huu. Nimefurahishwa jinsi ambavyo nimerejea uwanjani na kutingisha nyavu.”

Lakini baadaye, Rooney aliweka wazi katika mtandao wake wa Twitter kuwa amepanga kubaki Old Trafford: “Ni matokeo mazuri leo usiku. Najivunia kuifungia United mabao 200. Nina matumaini mengine mengi yatakuja.”

Mtangazaji huyo, aliendelea kumbana Rooney ili aweke wazi kama ni kweli aliomba kuondoka Manchester United majira ya joto, baada ya kocha wake wa zamani, Sir Alex Ferguson, kusema kuwa mshambuliaji huyo anataka kuondoka na Chelsea kutuma ofa mbili kwa ajili ya mchezaji huyo.

“Sikiliza, tayari nimekwishakwambia,” alijibu Rooney, “Niko ‘bize’ na kutandaza soka kama ambavyo nimekuwa nikifanya misimu yote.”

Utambi ulichochewa zaidi, baada ya Moyes kutakiwa kueleza kama Rooney ana furaha kubaki United na kuitumikia kwa muda mrefu.

“Sijui,” alijibu Moyes. “Amekuwa akifanya vizuri katika mazoezi, akijituma kwa bidii, anaonekana kuwa fiti na aliyejinyenyekeza. Nafikiri Robin van Persie na yeye kwa pamoja ni wachezaji wazuri.”

Rooney alipumzishwa baada ya dakika 86 na kushangiliwa sana na mashabiki wa Old Trafford na Moyes, alikiri kuwa amefurahishwa na mchango wa mshambuliaji huyo na kumpongeza kwa kufikisha mabao 200 ndani ya Old Trafford.”