RVP AMSHOBOKEA WAYNEY ROONEY, COUNTINHO KUKOSA MECHI SITA LIVER, MESSI HAJAOMBA KUONGEZEWA MSHAHARA NA RAMOS AMRUDISHA IKE CASLAS BENCHI

LONDON, England

MSHAMBULIAJI wa Manchester United, Robin van Persie, amemsifia mchezaji mwenzake, Wayne Rooney, baada ya United kushinda mabao 4-2 katika mchezo wa kwanza wa Ligi ya Mabingwa, uliopigwa Jumanne.

Nyota huyo wa Uholanzi, alipachika bao lake la sita katika msimu huu dhidi ya Bayer Leverkusen, katika mechi hiyo ya kwanza hatua ya makundi, lakini Rooney, alikuwa nyota wa mchezo kwa kutingisha nyavu mara mbili na kuweza kufikisha mabao 200 katika klabu hiyo.

Kwa sasa nyota huyo wa England, Rooney, amekuwa mtu wa nne katika rekodi ya wachezaji wenye mabao mengi katika historia ya klabu ya United, jambo ambalo limemfurahisha mchezaji huyo na Van Persie amefurahia kucheza na mshambuliaji huyo.

“Wayne alicheza vizuri,” aliiambia televisheni ya MUTV. “Napenda kucheza naye kwa kuwa anaweza kufanya kila kitu, anaweza kurudi nyuma, anaweza kucheza pasi ndefu na fupi. Alicheza vizuri sana.”

Pia nyota huyo wa Uholanzi alimsifia mchezaji wao mpya, Marouane Fellaini, ambaye alicheza vizuri kwa dakika 80.

“Naye Marouane alicheza vizuri pia,” aliongeza Van Persie. “Alikuwa ngangari na alinasa mipira mingi. Anacheza kwa kujiamini na kila wakati alikuwa akijaribu kupeleka mipira mbele.”

 @@@@@@@@@@

Coutinho kukosa mechi sita Liver

LIVERPOOL, England

KIUNGO wa Liverpool, Philippe Coutinho, atakuwa nje hadi mwishoni mwa Oktoba, baada ya kuumia bega katika mchezo wa Ligi Kuu England dhidi ya Swansea.

Nyota huyo mwenye umri wa miaka 21, alitolewa nje katika mchezo uliomalizika kwa sare ya mabao 2-2 kwenye uwanja wa Liberty, baada ya kugongana na Ashley Williams.

Jopo la madaktari wa Reds, wameamua kumfanyia upasuaji kwenye kiungo, ambapo itamfanya nyota huyo wa Brazil kukosa mechi sita.

Kocha Brendan Rodgers, amefanikiwa kukaa kileleni mwa msimamo wa Ligi Kuu England, bila ya mshambuliaji wake, Luis Suarez, aliyefungiwa mechi 10, baada ya kumng’ata beki wa Chelsea, Branislav Ivanovic, msimu uliopita.

Nyota huyo wa Uruguay anajiandaa kurejea dimbani katika mchezo wa Capital One Cup dhidi ya Manchester United, utakaochezwa Jumatano ijayo.

Coutinho, ametoa mchanganuo mkubwa kwenye kikosi cha Rodgers tangu alipowasili Januari mwaka huu akitokea Inter Milan.

@@@@@@@@@@@@

 

Messi hajaomba kuongezwa mshahara

BARCELONA, Hispania

RAIS wa Barcelona, Sandro Rosell, amesema kuwa mshambuliaji wake, Lionel Messi, hajaomba kuongezwa mshahara, baada ya Real Madrid kumfanya Cristiano Ronaldo mchezaji bora anayelipwa zaidi duniani.

Juzi Jumapili, Ronaldo, alisaini mkataba mpya wa miaka mitano wenye thamani ya dola milioni 21 kwa msimu na kuwa mwanasoka anayelipwa zaidi na kuibua tetesi kuwa huenda Messi akaomba kuongezewa mshahara.

Rosell alisema mkataba mpya wa Ronaldo, hausumbui lolote mkataba wa nyota wao wa Argentina, katika klabu hiyo ya Camp Nou.

“Mkataba mpya wa Ronaldo haujaathiri ule wa Messi na hajasema lolote kwetu,” alikaririwa Rosell.

“Ana furaha na yuko kwenye klabu bora duniani.”

Rais huyo wa Barca, yuko katika kujadili mkataba mpya wa Andres Iniesta na mchezaji huyo anatarajiwa kusaini mkataba huo hivi karibuni.

@@@@@@@@@@@@@

Ramos amrudisha

Iker Casillas benchi

MADRID, Hispania

MAMBO yamekwenda vibaya kwa mlinda mlango wa Real Madrid, Iker Casillas.

Huenda akapoteza nafasi katika kikosi cha kwanza cha timu yake ya Taifa ya Hispania na klabu yake ya Real Madrid, baada ya kurejea uwanjani kwa mara ya kwanza tangu akae benchi kwa siku 238, lakini aliishia kucheza dakika ya 13, baada ya kuumia mbavu.

Madrid walicheza mechi yao ya kwanza ya Ligi ya Mabingwa dhidi ya Galatasaray nchini Uturuki, lakini alikaa langoni dakika chache, baada ya kugongana na beki wake, Sergio Ramos, wakati walipokuwa wakiokoa mpira wa krosi.