SWALI LA KIZUSHI: JE, IBRAHIMOVIC, RONALDO WANAWEZA KUCHEZA PAMOJA?

DIRISHA la usajili linapofunguliwa, siku zote huambatana na uvumi wa hali ya juu, mara huyu anaenda huku, yule anaenda kule, ilimradi fujo tu.

Vyombo vya habari vya Uingereza vimejikita kwenye kuanzisha uvumi kwa ajili ya mashabiki wa soka ambao siku zote huwa wanatamani kuona habari ambazo zinawahusisha wachezaji wenye majina makubwa duniani na klabu zao.

Mashabiki wa Manchester United ndio wamekuwa wakilengwa kwenye dirisha hili la usajili la kiangazi. Usajili umefunguliwa kwa mwezi mmoja sasa na hakuna mchezaji mwenye jina kubwa hata mmoja aliyetua kwenye klabu hiyo.

Kocha mpya, David Moyes amejikuta akipata wakati mgumu sana kufanya usajili mkubwa kwenye kibarua chake kipya. Wachezaji mastaa wote alioonyesha nia ya kuwasajili, wamekuwa wagumu kukubali kutua Old Trafford.

Pamoja na hayo, vyombo vya habari vya Uingereza, vimeendelea kuihusisha timu hiyo na wachezaji wakubwa, safari hii gazeti la Daily Star, limeibua upya uvumi wa Cristiano Ronaldo kurudi Old Trafford.

Kwa mujibu wa gazeti hilo, Rais wa Real Madrid, Florentino Perez amekuwa kwenye mazungumzo na Man United juu ya uwezekano wa kumrudisha Ronaldo, Old Trafford.

Gazeti hilo limedai kwamba, sababu kubwa ya kuibuka kwa sakata hilo ni kitendo cha Real Madrid kuelekeza nguvu zao nyingi kwenye mbio za kumsajili winga wa Tottenham Hotspur, Gareth Bale kwa ajili ya kuja kuchukua nafasi ya Ronaldo.

Kama uvumi huo hautoshi kuwafanya mashabiki wa Red Devils kudata kwa furaha, gazeti lingine la Uingereza la Daily Mail, limeihusisha klabu hiyo ya Old Trafford na staa mwingine kwenye Ulimwengu wa soka.

Gwiji wa Man United, Peter Schmeichel aliliambia gazeti la Sweden la Expressen, kwamba straika wa Paris Saint-Germain, Zlatan Ibrahimovic utakuwa bonge la usajili kwa kocha mpya wa timu hiyo, Moyes.

“Unaweza kujiuliza kwa nini bado Zlatan (Ibrahimovic) hajawahi kucheza England, lakini ningependa kumuona akichezea Manchester United, sijui ni shabiki wa timu gani, lakini naamini alizaliwa kuichezea Manchester United na atatisha kwenye timu hiyo,” alisema Schmeichel.

Watu wanashindwa kujua mara moja iwapo Schmeichel anaongeza mafuta ya taa kwenye moto au kuna kitu cha ziada anajua kuhusu mchezaji huyu na Man United.

Ibrahimovic amewahi kuhusishwa na kujiunga na Man United miaka ya nyuma, lakini uvumi wake haukushika kasi sana.

La msingi kulitambua hapa ni kwamba, Moyes ananafasi ndogo sana ya kumnasa mmoja wapo kati ya Ronaldo na Ibrahimovic, achilia mbali wote wawili.

Lakini tukiachana na ukweli huo, hebu tujiulize swali la kizushi tu, ambalo linaweza kuwa mjadala mkubwa sana vijiweni, je, Ibra na Ronaldo wanaweza kucheza timu moja?

Jibu la kwanza kwenye swali hili, linaweza kuwa kujiuliza iwapo tabia, ubinafsi wa kila mmoja utaweza kuwaruhusu kucheza pamoja?

Wote wawili wanapenda kucheza kwenye timu ambazo wao wanachukuliwa kama wachezaji muhimu zaidi. Lakini kutokana na ubora wa kila mmoja, hilo limekuwa likifanyika, kila wanapoenda wao ndio huwa muhimu ndani ya vikosi vyao.

Kuna msemo wa Kiingereza usemao; ‘The world cannot revolve around two suns’ (Dunia haiwezi kuzunguka majua mawili), hivyo timu haiwezi kufanya vizuri kama itakuwa na mastaa wawili ndani yake.

Kama Moyes alikuwa anajaribu kuwashawishi wote wawili kutua Manchester, ni wazi kabisa atakuwa anafanya hivyo kutokana na njaa ya ushindi waliyonayo wote wawili.

Lakini ni ngumu kuamini iwapo wawili hao, wataweza kucheza pamoja bila kugombana uwanjani mara kwa mara.

Ubora wa wawili hao hauna ubishi, lakini swali ni je, wanaweza kucheza kwenye kikosi kimoja?

Kati ya wawili hao, Ibrahimovic atahitajika kucheza kati kati zaidi. Wote ni hatari kwenye mifumo ya timu zao.

Hivyo Ronaldo atapelekwa pembeni, sana sana atachezeshwa upande wa kushoto.

Lakini ukiangalia mbali zaidi, utagundua kwamba ni ngumu kwa Ronaldo kuridhika kucheza pembeni muda wote, kuna wakati atataka kuingia kati kati na kucheza kama mshambuliaji, hapo kazi ndiyo itaanza.

Novemba 2012, Wakala wa Ibrahimovic, Mino Raiola alinukuliwa na mtandao wa Goal.com akisema kwamba, anaamini mteja wake na Ronaldo wanaweza kufanya makubwa sana PSG, kwa sababu wachezaji wazuri siku zote hawapati tabu kucheza pamoja.

Maneno yake kwamba wachezaji bora hawawezi kupata tabu kucheza pamoja, yanaweza kuwa jibu la makala haya.

Kuna sababu nyingi ambazo zinathibitisha kwamba, Ibrahimovic na Ronaldo hawawezi kucheza pamoja, lakini kuna sababu moja tu ambayo inaonyesha kwamba wawili hao wanaweza kufanya makubwa pamoja.

Sababu hiyo moja ambayo inaunga mkono kombinesheni ya Ibra na Ronaldo ni kwa sababu wote wawili ni bora na wachezaji bora siku zote hupata njia ya kuipa timu yao ushindi.

Baada ya kujiuliza swali hili la kizushi, tusubiri kuona iwapo Ibra na Ronaldo watatua Man United na kama wataweza kucheza pamoja, au ndiyo mmoja atafulia na kumuacha mwingine ang’are.