KITENDO CHA KUACHWA KASEJA CHAMSIKITISHA MOLOTO

KOCHA Mkuu wa zamani wa Simba, Trott Moloto, ameililia Simba kwa kitendo chake cha kumtema Juma Kaseja katika msimu mpya wa Ligi Kuu Tanzania Bara, unaotarajiwa kuanza baadaye mwezi huu.

Moloto, aliyeifundisha timu hiyo katika msimu wa 2004/05 wa Ligi Kuu Bara, amepokea kwa masikitiko taarifa za Kaseja kutemwa wakati akiwa ni kipa namba moja kwenye Kikosi cha Timu ya Taifa 'Taifa Stars'.

Kaseja alikuwa ni chaguo la kwanza katika kikosi chake, wakati Moloto anaifundisha Simba, aliyeiacha baadaye kabla ya kumalizika kwa msimu wa Ligi Kuu Bara, baada ya kutolewa na Enyimba ya Nigeria, katika Ligi ya Mabingwa Afrika.

Akizungumza jijini hapa, Moloto alishangaa kusikia Kaseja kuachwa kwenye kikosi cha timu hiyo, huku akishindwa kufahamu sababu zilizoufanya uongozi wa Simba kumtema.

Awali Moloto alitaka kujua maendeleo ya Kaseja, baada ya kuachana naye kwa muda mrefu akiwa kocha wa timu hiyo, ambaye baadaye mikoba yake aliichukua  Mzambia, Patrick Phiri.

"Kaseja hajambo?" Alimuuliza mwandishi wa habari hizi, baada ya kubadilishana naye mawazo kwa muda walipokutana katika Uwanja wa Klabu ya Mamelodi Sundowns anayoinoa kwa sasa.

Hata hivyo, alisema kuwa kama Simba walimtema kwa sababu nyingine kama umri, huo ungekuwa ni uamuzi wa viongozi wake, kwa kuwa ameweza kuichezea timu hiyo zaidi ya miaka 10, lakini kwa kiwango si sahihi kwani bado ndiye namba moja katika Kikosi cha Stars.

Wakati huo huo, alisema ana mpango wa kuileta nchini, timu ya Mamelodi ili iweze kucheza mechi tatu za kirafiki katika jiji la Dar es Salaam na Mwanza.

Moloto alisema atawasiliana na uongozi wa klabu hiyo ili waweze kupata ziara hiyo, ambayo inaweza kuwa na mafanikio kwao.