BALE NA SUAREZ NANI ANATISHA?

KWA wafuatiliaji wazuri wa hekaheka za usajili barani Ulaya, haipiti siku ambayo wamesoma au kusikiliza habari za usajili bila kusikia sakata la Gareth Bale au Luis Suarez.

Kocha wa Liverpool, Brendan Rodgers, alinukuliwa na mtandao wa Goal.com akisema: “Unahitaji kuangalia soko na kulinganisha dau la pauni 40,000,001 (ofa ya Arsenal kwa Suarez), kisha kuangalia ofa ya zaidi ya pauni milioni 100 ya Gareth Bale.”

Licha ya Liverpool kupinga kumuuza Suarez wakati huu wa kiangazi, Arsenal bado hawajakata tamaa ya kumsajili Mruguay huyo. Wakati huohuo, staa wa Tottenham Hotspur, Bale amewekewa mezani ofa ya pauni milioni 100 na Real Madrid, jambo ambalo lilisababisha Rodgers kulinganisha wawili hao.

Rodgers alidai kwamba Bale na Suarez walikuwa wachezaji bora zaidi kwenye Ligi Kuu England msimu uliopita, hivyo haiwezekani Bale akamzidi thamani Suarez kwa zaidi ya asilimia 100.

Sawa hayo ni mawazo ya Rodgers, lakini je, yana mashiko? Kutokana na sakata la usajili la wawili hawa na ofa ya mamilioni ya fedha iliyoko mezani kwa ajili yao, imezua maswali nani bora kati ya Luis Suarez na Gareth Bale?

Nani ana thamani kubwa na nani atarudisha fedha yote kama akihamia timu nyingine wakati huu wa kiangazi?

Kujibu maswali haya, vinaangaliwa vipengele vinne muhimu na kujua yupi anamfunika mwenzake kwa ubora.

Mabao

Suarez amefunga mabao 30 kwenye mechi 44 akiwa na Liverpool msimu uliopita, hivyo ana wastani wa bao 0.68 kwa mechi. Bale alifunga mabao 26 katika mechi 45 na kuwa na wastani wa bao 0.57 kwa mechi.

Idadi ya mabao ya Suarez, inathibitisha kwamba ni bora zaidi ya Bale, na hili lilitegemewa kwa sababu Mruguay huyo ni straika. Alifunga asilimia 32 ya mabao ya timu yake, kulinganisha na asilimia 31 ya Bale.

Matokeo: Akiwa kama mshambuliaji, Suarez anaongoza kipengele hiki cha kucheka na nyavu na amethibitisha ubora wake kwa kufunga kila kukicha.

Miaka

Suarez atatimiza umri wa miaka 27 Januari mwakani na hapo atakuwa ndiyo anaingia kwenye kilele cha soka lake kama mchezaji. Kama Arsenal wakimsajili wakati huu wa kiangazi watakuwa wamemnasa mchezaji aliye kwenye kilele cha soka lake, na atakuwa na miaka mitatu mbele yake kabla ya kiwango chake kuanza kuporomoka.

Bale amezidiwa na Suarez miaka miwili na nusu na bado ana misimu kadhaa kabla ya kufikia kilele cha mafanikio yake. Kuwekeza kwa Bale sasa hivi kutalipa kwa miaka sita.

Ukiangalia hilo dau la pauni milioni 100 ambalo Real Madrid wako radhi kutoa kwa ajili yake itakuwa ni sawa na pauni milioni 16,6 kwa msimu mpaka atakapofika miaka 30, wakati Arsenal wakitoa ofa yao itakuwa ni sawa na pauni 13.3 kwa msimu mpaka Suarez akifikisha miaka 30 pia.

Matokeo: Licha ya ofa yake kuwa kubwa, lakini umri mdogo wa Bale unamfanya kuwa uwekezaji mzuri zaidi. Uwekezaji wa Bale ni wa muda mrefu kuliko Suarez ambaye bado kidogo sana kumaliza kwenye soka. Pia umri wake mdogo kulinganisha na wa Suarez unaipa Madrid nafasi ya kumuuza siku za usoni na kurudisha sehemu ya gharama walizomnunulia kama wakimchoka.

Mchango

Mabao ndio kitu muhimu kwenye timu yoyote. Uwezo wa wote kufunga unajulikana, lakini vipi kuhusu mchango wa Bale na Suarez katika kuwalisha wachezaji wenzao.

Suarez anacheza sehemu ambayo anatengenezewa zaidi kuliko kutengeneza, msimu uliopita alitoa pasi za mwisho tano na zote hizo kwenye ligi kuu. Bale yeye alipiga pasi za mwisho 10.

Matokeo: Kutokana na kucheza nyuma zaidi kuliko Suarez eneo la kiungo, inategemewa kuona Bale akiwa ametengeneza mabao mengi zaidi kuliko Mruguay huyo. Msimu uliopita alipika mabao 10 na hii inamaanisha Bale alichangia jumla ya mabao 36 ukijumlisha na aliyofunga, wakati Suarez yeye alichangia mabao 35, Bale ni bora zaidi kwenye kipengele hiki.

Muonekano kwenye jamii

Siku zote mchezaji husajili kutokana na uwezo wake uwanjani. Lakini ukiangalia ofa za fedha zinazotolewa ni lazima timu itaangalia muonekano wa mchezaji kwenye jamii na tabia zake kwa sababu kwenye soka la kisasa timu hutaka kurudisha fedha yao waliyoweka kwa mchezaji kupitia mauzo ya haki za picha na jezi.

Inapoangaliwa tabia ya Suarez siku zote amekuwa hajatulia na amekuwa akiandamwa na matukio ya kitata, sasa hivi ana adhabu ya kufungiwa mechi 10 kwa kumng’ata beki wa  Chelsea, Branislav Ivanovic msimu uliopita.

Suarez pia amewahi kufungiwa mechi saba msimu uliopita kwa kumng’ata mtu alipokuwa akichezea Ajax mwaka 2012. Pia amewahi kukutwa na hatia ya kumbagua Patrice Evra mwaka 2011, na kufungiwa mechi nane.

Mwaka 2010 wakati wa michuano ya Kombe la Dunia alidaka mpira kwenye mstari wa goli katika mechi dhidi ya Ghana, na alishangilia sana baada ya Asamoah Gyan kukosa penalti hiyo na alipondwa na watu kutokana na kushangilia kitendo chake hicho. Pia Suarez anatajwa kama mfalme wa kujiangusha kusaka penalti.

Upande wa pili, Bale amekuwa mkimya sana, ni mara chache sana amekutana na skendo za ajabu ajabu, amewahi kulaumiwa kwa kupenda kujirusha na kusaka penalti, lakini linapokuja suala la wadhamini Bale anavutia zaidi udhamini kuliko Suarez.

Matokea: Bale ni mshindi kwenye kipengele hiki kutokana na tabia za Suarez mara nyingi hufunika uwezo wake uwanjani, wakati Bale yeye ameacha miguu yake ifanye kazi na ndio maana alishinda tuzo zote binafsi katika Ligi Kuu England msimu uliopita.