CHELSEA YAONGEZA DAU KWA ROONEY, SUAREZ AKITUA ARSENAL ATAUA BENDI NA GUARDIOLA AONGOZA KUUA BAYERN

 

London, England

Chelsea ipo tayari kuongeza dau zaidi kwa Mshambuliaji wa Manchester United, Wayne Rooney.

Gazeti la London Evening Standard, limeeleza kuwa Chelsea itatoa ofa nyingine ya kumsajili Rooney na kwamba inaandaa pauni milioni 40 (sh. bilioni 96.2 za Tanzania) kwa nyota huyo wa Kimataifa wa England.

Rooney bado ni chaguo la kwanza kwa Chelsea katika mpango wake wa usajili wa majira haya ya joto, na tayari ilishatoa ofa ya pauni milioni 27 ambazo zilikataliwa mwezi uliopita.

Kwa sasa Chelsea ina washambuliaji Fernando Torres, Romelu Lukaku na Demba Ba, lakini Jose Mourinho anamtaka Rooney akaongoze safu hiyo.

@@@@@@@@@

Gerrard: Suarez akitua Arsenal ataua bendi

Liverpool: NAHODHA wa Liverpool, Steven Gerrard amesema itakuwa ni majanga kama Luis Suarez ataamua kujiunga na Arsenal mwezi huu.

Gerrard aliiambia Liverpool Echo: “Kama atakwenda Arsenal, ni wazi ataufanya msimu wetu kuwa mgumu, ataiimarisha na kuwafanya wapinzani wetu ambao tunawania nao nafasi ya nne kuwa imara."

@@@@@@@@

Guardiola aiongoza Bayern kuua

Munich: KOCHA wa Bayern Munich, Pep Guardiola ameiongoza timu yake kuifunga Sao Paulo kwa mabao 2-0 kwenye kinyang'anyiro cha Kombe la Audi na hivyo kuifuata Manchester City katika fainali itakayopigwa Uwanja wa Allianz Arena wiki hii.

Mabao ya Bayern yalipatikana kipindi cha pili kupitia kwa Mario Mandzukic aliyefunga la kwanza na Mitchell Weiser wakati ambapo Rogerio Ceni alikosa penalti kwa upande wa Sao Paulo. Bayern sasa itakutana na City ambayo iliifunga AC Milan 5-3.

@@@@@@@@@

Adebayor, Defoe hatihati Spurs

London: MUSTAKABALI wa baadaye wa washambuliaji wa Tottenham, Jermain Defoe na Emmanuel Adebayor katika kikosi hicho, upo mashakani kutokana na ujio wa Mshambuliaji wa Valencia, Roberto Soldado.

Gazeti la 'The Daily Mail', limeeleza kuwa Andre Villas-Boas anamuona Soldado, 28, kama mshambuliaji sahihi katika safu hiyo na hivyo mustakabali wa Defoe na Adebayor kuwa mashakani.