Beki bora imezimwa na kipaji cha Neymar

BALE HORIZONTE, Brazil

BRAZIL waliipiga Uruguay 2-1 kwenye nusu fainali ya kwanza ya michuano ya Kombe la Mabara mwaka 2013 na kujihakikishia kuingia fainali mashindano hayo itakayopigwa kwenye dimba la Maracana.

Fred na Paulinho walifunga mabao ya Brazil wakati lile la Uruguay liliwekwa kimiani na Edinson Cavani.

Makala haya yanaiangalia mechi hiyo kiufundi zaidi na kipi kiliwapa vijana wa Luiz Felipe Scolari ushindi.

Mfumo

Uruguay walitumia mfumo wa 4-3-1-2, huku Diego Forlan akipewa majukumu ya kucheza kama namba 10, wakati Brazil walitumia mfumo wa 4-2-3-1 ambao umewapa ushindi kwenye mechi zao zote za msimu huu.

Hakukuwa na mabadiliko yoyote yaliyofanyika kwenye kikosi cha Scolari, lakini Oscar Tabarez alifanya mabadiliko tena.

Kukabia juu kwa Uruguay

Uruguay (La Celeste) walianza kwa kukabia juu kwenye nusu ya Brazil na kuwalazimisha Brazil kupiga pasi kurudi nyuma na mabeki wake kufanya makosa.

Paulinho na Luiz Gustavo walihaha kutengeneza nafasi, huku wakikabwa kwa nguvu na kina Edinson Cavani na Luis Suarez, hiki kilizima mashambulizi ya Selecao.

Viungo watatu wa Uruguay, Alvario Gonzalez, Arevalo Rios na Cristian Rodriguez – walikabia juu na kuwapa Brazil nafasi ndogo ya kucheza.

Kikosi cha Brazil kimekuwa na matatizo kwenye kutengeneza nafasi, lakini kutokana na mfumo wa Tabarez mambo yalizidi kuwa magumu kwa Wabrazil.

Brazil kukosa mbinu mbadala

Kitendo cha Brazil kukabiwa juu kilimaanisha timu kushindwa kucheza kupitia katikati ya uwanja, hivyo mara kadhaa walijikuta wakipiga mpira pembeni na kuchezea huko.

Hii iliwasababisha wachezaji wa pembeni kuchangamka kwa sababu viungo watatu wa Uruguay walifanya kazi nzuri sana kumtuliza Oscar ambaye alikuwa akicheza kama Namba 10 na kumnyima nafasi ya kukimbia na mipira katikati ya uwanja.

Marcelo alionyesha kiwango cha hali ya juu, lakini Neymar mara zote alikuwa amekabwa na mtu zaidi ya mmoja. Hulk, kama kawaida yake hakuwa na jipya, hakuna alichokifanya upande wa kuliwa wa Selecao na kumpa kazi kubwa sana Neymar upande wa kushoto.

Neymar mara kadhaa alishuka chini sana kuchukua mipira, lakini alipopata mipira alikuwa na wakati mgumu sana kumtafuta mtu wa kumpa mipira zaidi ya beki wake wa kushoto.

Mipira mirefu

Kitendo cha Uruguay kukabia juu, kiliwalazimisha David Luiz na wenzake kuanza kupiga mipira mirefu kutokea nyuma, hivyo beki ya Celeste ililazimika kuwa vizuri kwenye mipira ya juu.

Bahati nzuri wote Diego Godin na Diego Lugano walikuwa vizuri sana kwenye beki wa kati hivyo kumzima kabisa Fred ambaye alijikuta akishindwa kucheza kabisa.

Ilihitajia kipaji binafsi kutoka kwa Neymar Brazil kupata bao la kwanza; kwanza alinza kwa kujitengenezea nafasi na kukimbia huku akihakikisha haotei na kupokea pasi ndefu ya Paulinho kwa kifua kisha kupiga mpira ambao uligonga kipa wa Uruguay, Fernando Muslera usoni, lakini haikwenda mbali na kumkuta Fred ambaye hakufanya ajizi alifunga kirahisi.

Bao hilo lilithibitisha kwamba mfumo wa Uruguay, uliwalazimisha Brazil kucheza mipira mirefu ambayo pia ilisaidiwa na kipaji binafsi cha mtu mmoja bao hilo kupatikana.

Kipindi cha pili

Kipindi cha pili Brazil walianza kuchanganya licha ya Uruguay kusawazisha bao hilo kupitia kwa Edinson Cavani, Brazil walionekana bora na walistahili ushindi.

Kutoka kwa Hulk kuliifanya Selecao kubadilika na kuwa bora zaidi, hii inatokana na Bernard aliyeingia kucheza upande wa kulia kuwa na kasi na vitu vya ziada.

Kuingia kwa Bernard kuliisaidia Brazil kumiliki mpira zaidi kwa sababu Hulk alikuwa akipoteza sana mipira, pia kinda huyo alikuwa muhimu sana kwenye mashabulizi ya kushtukiza.

Hitimisho

Brazil bado hawajatulia na wanapoteza sana mipira. Kiungo cha kati kwenye timu hiyo bado utata, japokuwa kilifanya vizuri zaidi baada ya Paulinho kusogezwa mbele kucheza kama namba 10 kwenye dakika za mwisho za mechi.

Hawana kiungo mwenye uwezo wa kuchezesha timu na kumiliki mpira na hilo linaweza kuwaangusha kwenye mechi ya fainali.

Hivyo ndio ilivyo kwa Uruguay wanaviungo wazuri, lakini bado hawajafikia kuwa timu bora. Mashambulizi yao ya kushtukiza ni makali sana lakini hawawezi kufika mbali kama kiungo chao kinamtegemea Arevalo Rios.

Neymar ndiye aliyetengeneza mabao yote mawili ya Brazil, la kwanza baada ya kuonyesha kipaji cha hali ya juu, la pili kwa njia ya kona, hivyo kipaji cha Neymar ndicho kilichoibeba Brazil.