Ronaldo, Bale ndani, hiyo ndiyo Madrid ya Ancelotti

MADRID, Hispania

HATIMAYE, Jumanne wiki hii Carlo Ancelotti alitangazwa rasmi kuwa kocha wa Real Madrid na anatarajiwa kuanza kuijenga timu hiyo kwa ajili ya msimu wa 2013-14.

Muitaliano huyo ambaye amewahi kuzifundisha klabu za Paris Saint-Germain, Chelsea na AC Milan anasifika kwa kuwa na tabia ya kufanya mapinduzi kwenye timu yoyote anayoifundisha na anatarajiwa kufanya hivyo pale Santiago Bernabeu.

Ancelotti amekuwa akitumia mifumo mbali mbali kwenye maisha yake ya ukocha, alipokuwa Paris Saint-Germain na Chelsea alitumia 4-4-2, AC Milan 4-3-2-1.

Tofauti na makocha wengi Ancelotti amekuwa na tabia ya kuendana na mazingira ya klabu aliyopo pamoja na wachezaji alionao na kuna kila dalili kwamba Muitalioano huyo hatabadilisha mfumo wa sasa wa Madrid wa 4-2-3-1.

Siku zijazo anaweza kuja na mfumo mpya, lakini kwa sasa anatarajiwa kutumia mfumo ambao ulikuwa ukitumiwa na Jose Mourinho.

Ancelotti atagundua kwamba hata kama akija na staili, mifumo na ufundi mpya kwenye timu hiyo, anatakiwa kuendelea kutumia mfumo wa 4-2-3-1 katika siku za mwanzo akiwa Bernabeu.

Kuondoka kwa Gonzalo Higuain kutamaanisha kwa Muitaliano huyo amebakiza mshambuliaji mmoja tu mkali Karim Benzema, Japokuwa Alvaro Morata amepandishwa kutoka timu ya vijana ya Real Madrid, Castilla, huku klabu hiyo ikiendelea kumuwania Edinson Cavani na Luis Suarez.

Wote hawa rais Florentino Perez anawaona kama bei yao ni kubwa sana na hilo linaweza kumaanisha kwamba hakuna mshambuliaji mpya atakayesajili kipindi hiki cha kiangazi, huku klabu ikimtolea macho zaidi Gareth Bale.

Winga huyo wa Tottenham Hotspur atasajili wa bei kubwa, lakini Perez yuko radhi kulipa dau lolote kwa ajili yake, kwa sababu staa huyo anaweza kuongeza mapato kutokana na mauzo ya jezi na haki za picha.

Perez wiki hii alinukuliwa akisema; “Wachezaji wazuri wanajilipia wenyewe. (Luis) Figo, (Zinedine) Zidane, Ronaldo na (David) Beckham waliongeza mapato yetu. Kama ukiwekeza kwa mchezaji mzuri utaingiza fedha nyingi zaidi.”

Bale, hata akiuzwa kwa euro milioni 90, yuko kwenye kundi hilo. Cavani, kwa pauni milioni 63 hayako kwenye kundi hilo, hii inamaanisha Ancelotti anaweza kumkosa mshambuliaji aliyewahi kutaka kumsajili alipokuwa Chelsea.

Isco tayari katua, staa huyo wa Malaga anakuja kujaza sehemu ya kuingo mchezeshaji kutokana na Mesut Ozil na Kaka, ambaye alifanikiwa sana chini ya Ancelotti, AC Milan, wakionekana kukosa nafasi.

Isco anaweza kuanza kama kiungo mshambuliaji au upande wa kulia kwenye timu ambayo Bale atakuwa ndani pia. Na kama Bale asipotua Bernabeu wakati wa kiangazi wote Isco na Ozil wataanza kwenye kikosi cha Ancelotti

Wakati huo huo Benzema atakuwa chaguo la kwanza kwenye timu hiyo kama timu isiposajili mshambuliaji, japokuwa Isco, Bale na Cristiano Ronaldo wanaweza kucheza kama washambuliaji wa kati.

Maeneo mengine Iker Casillas atarudishwa kwenye goli la timu hiyo baada ya kusugua bechi chini ya Mourinho msimu wa 2012-13.

Ancelotti pia anapenda kutumia viungo wawili wa uchezeshaji kwenye kiungo cha chini, Xabi Alonso atacheza sambamba na Luka Modric, huku Sami Khedira akisugua benchi.

Madrid pia wanatafuta mtu wa kuziba nafasi ya Alonso, siku za usoni, lakini wachezaji wanaowataka kina Ilkay Gundogan na Marco Verratti kwa sasa hawapatikani kwenye soko la usajili.

Dani Carvajal atachuana na Alvaro Arbeloa kucheza nafasi ya beki wa kulia baada ya kurudi Madrid akitokea Bundesliga.

Kikosi kamili kitakuwa hivi; Mfumo 4-2-3-1; Iker Casillas; Alvaro Arbeloa, Sergio Ramos, Raphael Varane, Marcelo; Luka Modric, Xabi Alonso; Gareth Bale, Isco, Cristiano Ronaldo; Karim Benzema