TEVEZ AMHALALISHA HIGUAIN ARSENAL, Real yamtoa Di Maria 'kafara' kwa Bale na Ronaldo huyooo United

Manchester, England

KITENDO cha Carlos Tevez kuthibitishwa kutua Juventus kwa pauni milioni 10, kimefungua njia kwa Gonzalo Higuain kukaribia kumalizana na Arsenal.

Mshambuliaji huyo wa Real Madrid amekubali kulipwa pauni 125,000 na 'the Gunners', na hivyo kuwa mchezaji atakayelipwa zaidi Arsenal, hivyo kuwapiku Jack Wilshere, Theo Walcott na Lukas Podolski.

Kwa sasa uhamisho wake unatarajiwa kuthibitishwa rasmi na Kocha mpya wa Real, Carlo Ancelotti.

Higuain, 25, kwa muda mrefu amekuwa akiwindwa na Juventus. Hata hivyo, kaka wa mchezaji huyo, Nicolas amethibitisha kuwa baada ya Tevez kutua Juventus sasa Higuain yupo karibu kujiunga na wakali hao wa Emirates.

Alisema: “Kama Tevez atajiunga na Juve, Higuain anakaribia Arsenal? Nadhani hivyo.

“Juventus ni klabu kubwa, lakini Gonzalo atakuwa ni ghali zaidi kwao. Siwezi kukana kwamba Gonzalo kwa sasa anakaribia Arsenal.”

Kocha wa Arsenal, Arsene Wenger pia anamtolea macho Kiungo wa Everton, Marouane Fellaini.

@@@@@@@

Paulinho aipeleka Brazil fainali Mabara

Rio de Janeiro, Brazil

BAO la usiku la kichwa lililozamishwa kimyani na Paulinho, limeipeleka Brazil kwenye mechi ya fainali ya kuwania Kombe la Mabara baada ya kuitungua Uruguay 2-1.

Fred ndiye aliyeifungulia Brazil milango baada ya kuifungia bao la kwanza ikiwa ni dakika tatu baada ya Diego Forlan kukosa penalti kwa Uruguay.

Mwamuzi kutoka Chile, Enrique Osses alitoa penalti kwa Uruguay baada ya Beki wa Kati wa Brazil, David Luiz kumchezea madhambi Diego Lugano katika eneo la hatari.

Mapema katika kipindi cha pili, Edinson Cavani alifanikiwa kuisawazishia Uruguay ikiwa ni baada ya kuihadaa ngome ya ulinzi ya Brazil, lakini katika dakika ya 86, Paulinho alifunga bao la ushindi kwa wenyeji hao.

Uruguay itabidi kujilaumu yenyewe baada ya Brazil kuonyesha kiwango duni katika kipindi cha kwanza lakini ikashindwa kutumia nafasi hiyo.

Kwa matokeo hayo, Brazil sasa katika mchezo wa fainali Jumapili, itakutana na Hispania ama Italia, kutegemeana na matoke ya mechi ya nusu fainali ya pili iliyozikutanisha timu hizo jana usiku.

Brazil iliwachezesha: Julio Cesar, Dani Alves, Thiago Silva, Luiz, Marcelo, Oscar (Hernanes 72), Gustavo, Paulinho, Fred, Hulk (Bernard 64) na Neymar (Dante 90).

Uruguay: Muslera, Lugano, Godin, Caceres, Maxi Pereira, Rodriguez, Arevalo Rios, Gonzalez (Gargano 83), Forlan, Suarez na Cavani.

@@@@@@@

Real yamtoa Di Maria 'kafara' kwa Bale

Madrid, Hispania

KLABU ya Real Madrid imetoa ofa ya fedha na mchezaji mmoja kwa Spurs ili tu kuhakikisha Kocha wao mpya, Carlo Ancelotti msimu uajao anafanya kazi sambamba na Gareth Bale.

Winga wa Argentina, Angel Di Maria ni miongoni mwa wachezaji ambao miamba hiyo ya Hispania inatarajia kuwatoa 'kafara' kwa klabu hiyo ya White Hart Lane ili kumnasa mchezaji huyo bora wa mwaka wa Ligi Kuu England.

Hata hivyo, bado Tottenham imeendelea kuikataa ofa ya kumtoa Bale, 23.

Akizungumza baada ya kutangazwa kuwa mrithi wa Jose Mourinho aliyetua Chelsea, Ancelotti alisema: “Timu hii ni nzuri, lakini itahitaji mabadiliko kidogo, na si makubwa.”

Rais wa Real, Florentino Perez anawawinda Bale, Mshambuliaji wa Liverpool, Luis Suarez na nyota wa Napoli, Edinson Cavani.

Wakati huu ambao Bale hajaonyesha nia ya kutua Bernabeu, Tottenham imemwekea mezani dili la mkataba mpya ambapo atakuwa akilipwa pauni 170,000 kwa wiki.

@@@@@@@

Ronaldo huyooo United

Madrid, Hispania

Cristiano Ronaldo atakuwa njiani kutua Manchester United baada ya taarifa kueleza kuwa anatarajiwa kukutana na uongozi wa wakali hao wa Old Trafford siku tatu zijazo.

Nyota huyo wa Real Madrid amekuwa akihusishwa na kurudi England baada kumaliza msimu akiwa si mwenye furaha hapo Santiago Bernabeu, lakini ujio wa Kocha mpya, Carlo Ancelotti unaweza kuhitimisha zoezi hilo kwa kufanikiwa kumbakisha Hispania.

Mshambuliaji huyo wa zamani wa United, amepewa ofa ya pauni milioni 12 kwa mwaka ili akubali kubaki Bernabeu, lakini Ronaldo anahitaji pauni milioni tano zaidi, na amekuwa si mwenye furaha baada ya kauli ya Rais wa Real, Florentino Perez aliyoitoa akidai kwamba ‘kila kitu kina kikomo’.

Gazeti la Hispania "El Pais", limeripoti kuwa nahodha huyo wa Ureno atakutana na uongozi wa United kabla ya kwenda kujiandaa na msimu mpya na Madrid.

Lakini hata hivyo, Jumatano wakati Ancelotti akitambulishwa kwa waandishi wa habari kama kocha mpya wa Real, alisema: 'Cristiano ni mchezaji mkubwa na ninafura kufanya naye kazi.

"Niliwanoa Zidane, Ronaldo na Ronaldinho, na ninafurafa kufanya naye kazi."

Alipoulizwa kuhusu Radamel Falcao, ambaye alikuwa akiwinda na Madrid kabla ya kutua Monaco, Ancelotti aliongeza: "Ni mchezaji mzuri, lakini kuna Ronaldo, Higuain na Benzema."