SAFARI YA MIAKA 25: SIASA ZA MAENDELEO NA AMANI KAMA MSINGI WA DIRA YA TAIFA 2050

Safari ya miaka 25 ya Dira ya Taifa ya Maendeleo 2050 inaleta mtazamo mpya wa kuangalia siasa si tu kama nyenzo ya kushinda uchaguzi bali kama chombo kikuu cha kuleta maendeleo ya kudumu nchini. 

Wakati Rais Samia Suluhu Hassan akimkabidhi kitabu cha Nyenzo za Utekelezwaji wa Dira hiyo Rais wa Zanzibar, Dk. Hussein Mwinyi, na kushuhudia kusainiwa kwa tamko la pamoja kati ya serikali na sekta binafsi, alisisitiza kuwa amani na utulivu ndiyo mtaji mkubwa kuliko mitaji yote ya fedha katika kufanikisha malengo ya taifa.

Utekelezaji wa dira hii unahitaji siasa zinazovuka mipaka ya ushindani wa kawaida na kuelekeza nguvu kwenye uzalishaji, kuongeza ajira, kuimarisha huduma za jamii, na kuhakikisha rasilimali za nchi zinawanufaisha wananchi wote. Sekta binafsi imepewa jukumu kubwa la kutekeleza asilimia sabini ya dira hiyo, jambo linalotaka serikali na wafanyabiashara kujenga uhusiano wa kuaminiana na kutatua changamoto zote kwa mazungumzo badala ya migogoro. 

Sambamba na hilo, takwimu zinaonyesha kuwa utegemezi wa misaada kwenye bajeti ya serikali umeshuka kwa kiasi kikubwa kutoka asilimia saba nukta moja hadi asilimia sifra nukta tisa, hali inayodhihirisha mwelekeo wa Tanzania kujenga uchumi unaojitegemea kupitia vyanzo vya ndani na matumizi ya Soko Huru la Biashara Afrika.

Kwa upande wake, Dk. Mwinyi alitaja maeneo saba ya kimkakati yanayopaswa kupewa kipaumbele ikiwemo viwanda, utalii, uchumi wa buluu, kilimo cha kisasa, huduma za kifedha, uchumi wa kidijiti, na maendeleo ya rasilimaliwatu. 

Ili kuhakikisha malengo haya yanafikiwa bila kutegemea ahadi pekee, serikali imeweka nyenzo nne za kuratibu na kupima matokeo zikiwemo mpango elekezi wa muda mrefu, Mpango wa Nne wa Taifa wa Maendeleo wa Miaka Mitano, mwongozo wa tathmini, na mkakati wa mawasiliano. 

Hivyo, mafanikio ya Tanzania ya mwaka 2050 hayatatokana na miaka ya mbele bali yatajengwa kupitia maamuzi na kazi zinazofanywa leo, huku amani ikiendelea kuwa nguzo kuu ya kuwawezesha vijana, wakulima, na wafanyabiashara kuona matokeo halisi ya maendeleo katika maisha yao.