NEEMA YASHUSHWA KWA MACHINGA, MAMA LISHE NA BODABODA

 

 Katika jitihada za kuimarisha uchumi wa wananchi mmoja mmoja, Serikali ya Awamu ya Sita chini ya Rais Dkt. Samia Suluhu Hassan imetangaza neema kwa wafanyabiashara ndogondogo nchini kwa kuwapatia mikopo yenye riba nafuu ya asilimia saba tu kwa mwaka. 

Hatua hiyo ni sehemu ya dhamira ya Serikali ya kuwawezesha wananchi kiuchumi kupitia Wizara ya Maendeleo ya Jamii, Jinsia, Wanawake na Makundi Maalum kwa kushirikiana na Benki ya NMB.

Walengwa na Masharti ya Mikopo

Waziri wa sekta hiyo, Dkt. Dorothy Gwajima, amebainisha kuwa fursa hiyo inawalenga wafanyabiashara ambao mauzo yao ghafi hayazidi Shilingi milioni nne kwa mwaka. Makundi yaliyopewa kipaumbele ni pamoja na mama na baba lishe, wamachinga, pamoja na waendesha bodaboda wa aina zote ikiwemo pikipiki za magurudumu mawili, matatu na guta.

Ili kunufaika, mfanyabiashara anapaswa kuwa na sifa zifuatazo:

• Awe amesajiliwa kwenye Mfumo wa Utambuzi wa Wafanyabiashara Ndogondogo (WBN–MIS).

• Awe raia wa Tanzania mwenye umri wa kuanzia miaka kumi na nane na kuendelea.

• Awe na biashara inayotambulika katika eneo husika au na mamlaka za serikali.

• Awe na Kitambulisho cha Taifa (NIDA) au namba ya usajili ya NIDA.

Faida na Utaratibu wa Maombi

Tofauti na mikopo ya kibiashara yenye riba kubwa, mkopo huu wa Serikali unakuja na vionjo vya kipekee kwa lengo la kumlinda mjasiriamali. 

Muda wa marejesho ni kuanzia miezi mitatu hadi miezi ishirini na minne kulingana na aina ya biashara. Aidha, mkopo huo umewekewa bima dhidi ya kifo na ulemavu wa kudumu, jambo linalotoa usalama kwa familia ya mkopaji pindi majanga yanapotokea.

Utaratibu wa kuomba ni rahisi, ambapo mwombaji anatakiwa kufika katika tawi lolote la Benki ya NMB akiwa na nyaraka zake kwa ajili ya kujaza fomu. Baada ya uhakiki wa kibenki kukamilika, fedha hizo huingizwa moja kwa moja kwenye akaunti ya mhusika.

Mwito wa Serikali kwa Wananchi

Dkt. Gwajima amewasihi wananchi kuchangamkia fursa hiyo kwa wingi ili kukuza mitaji na kuongeza ajira. Kwa wale ambao bado hawajasajiliwa kwenye mfumo wa WBN–MIS, wamehimizwa kufika ofisi za Kata au Halmashauri zao haraka iwezekanavyo. Serikali imesisitiza kuwa kutakuwa na uwazi na haki katika utoaji wa mikopo hiyo, huku ikihimiza nidhamu ya marejesho ili fedha hizo ziweze kuzunguka na kuwanufaisha Watanzania wengi zaidi.