DIPLOMASIA YA KIMKAKATI: WAZIRI WA MAMBO YA NJE WA CHINA, WANG YI, AWASILI

Uhusiano wa kihistoria na kimkakati kati ya Tanzania na China umezidi kupata kasi mpya baada ya Mjumbe wa Kamati Kuu ya Chama cha Kikomunisti cha China na Waziri wa Mambo ya Nje wa nchi hiyo, Mheshimiwa Wang Yi, kuwasili jijini Dar es Salaam kwa ziara ya kikazi ya siku mbili, Januari 9-10, 2026.

Alipowasili katika Uwanja wa Ndege wa Kimataifa wa Julius Nyerere (JNIA), Mhe. Wang Yi alilakiwa na mwenyeji wake, Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo (Mb), akiongozana na Manaibu Mawaziri, Mhe. Dkt. Ngwaru Maghembe na Mhe. James Milya, pamoja na Katibu Mkuu, Balozi Dkt. Samwel Shelukindo.

Salamu Maalum kwa Rais Samia Katika kilele cha ziara yake, Mhe. Wang Yi anatarajiwa kukutana na kufanya mazungumzo na Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, Ikulu jijini Dar es Salaam. Katika mkutano huo, Waziri Wang Yi atawasilisha salamu maalum kutoka kwa Rais wa China, Mhe. Xi Jinping, ikiwa ni ishara ya udugu wa dhati kati ya mataifa haya mawili.

Uchumi, Biashara na Uwekezaji

 Ziara hii inakuja wakati ambapo ushirikiano wa kiuchumi kati ya Tanzania na China umefikia viwango vya kihistoria:

Thamani ya Biashara: 

Kwa mwaka 2024 pekee, thamani ya biashara kati ya nchi hizi mbili ilifikia takriban Dola za Marekani bilioni 5.2.

Miradi ya Uwekezaji: 

Hadi kufikia mwaka 2025, Mamlaka ya Uwekezaji na Maeneo Maalum ya Kiuchumi (TISEZA) ilisajili miradi 343 ya China yenye thamani ya Dola za Marekani bilioni 3.1, ikizalisha jumla ya ajira 82,404 kwa Watanzania.

Sekta Muhimu:

 Uwekezaji huo umelenga maeneo ya kipaumbele ikiwemo viwanda, kilimo, usafirishaji, mawasiliano, na utalii.

Urithi wa TAZARA na Miaka 60 ya Urafiki

 Moja ya ajenda kuu katika ushirikiano huu ni uendelezaji wa miundombinu, ambapo reli ya TAZARA inasalia kuwa alama ya kudumu ya urafiki wa mataifa haya. Reli hiyo yenye urefu wa kilomita 1,860 ni kielelezo cha mshikamano ulioasisiwa na Hayati Mwalimu Julius Nyerere na Hayati Mwenyekiti Mao Zedong.

Ziara ya Mhe. Wang Yi inathibitisha kuwa misingi ya kuaminiana na kuheshimiana iliyowekwa zaidi ya miongo sita iliyopita, inaendelea kuenziwa kwa vitendo na viongozi wa sasa, ikilenga kufungua fursa mpya za maendeleo kwa faida ya pande zote mbili.