FUTSAL: Timu ya Wanawake Yafunga Kambi Indonesia, Yajiandaa Kuweka Historia Kombe la Dunia Ufilipino

Timu ya taifa ya mchezo wa Futsal ya Wanawake imekamilisha kambi yake ya maandalizi ya wiki moja mjini Jakarta, Indonesia, na leo inatarajiwa kuelekea Manila, Ufilipino, kwa ajili ya kushiriki fainali za Kombe la Dunia la Futsal.

Tanzania inashiriki michuano hiyo mikubwa kwa mara ya kwanza kabisa baada ya kunyakua nafasi ya pili kwenye michuano ya Afrika iliyofanyika Morocco Mei, mwaka huu.

Timu Imeimarika Siku Hadi Siku

Kocha Mkuu wa timu hiyo, Curtis Reid, alisema kambi hiyo ilikuwa na manufaa makubwa, akitoa shukrani kwa Shirikisho la Soka Tanzania (TFF) kwa kufanikisha maandalizi hayo. Katika kambi hiyo iliyoanza Alhamisi iliyopita, timu ilicheza mechi nne za kirafiki.

"Nimefurahi kupata kambi ya Indonesia, imenisaidia sana kuimarisha wachezaji wangu, naishukuru TFF kwa kutekeleza hili," alisema Kocha Reid.

Aliongeza kuwa ameridhishwa na mwitikio wa wachezaji wake katika mazoezi na mechi za kirafiki.

"Umeona timu ilivyocheza mechi ya kwanza ilikuwa tofauti kwenye mechi ya pili, na ya tatu na hata hii ya nne. Naweza kusema timu imeimarika na ninaamini tutakuwa na michuano mizuri Manila," alisema kwa uhakika.

Lengo ni Kujifunza na Kupata Uzoefu

Kocha Reid alifafanua kuwa kikosi kinachoshiriki Kombe la Dunia kina sura nyingi mpya. Wachezaji wengi wanaounda kikosi hicho si wale walioshiriki michuano ya Afrika Morocco. Hii inatokana na wachezaji wengi wa awali kuwa kwenye klabu yao ya JKT ambayo ilishiriki michuano ya klabu bingwa Afrika.

"Hawa wachezaji wengi ni wapya si wale waliokuwa na timu kwenye michuano ya Afrika Morocco. Mechi hizi za kirafiki ndio mechi zao za kwanza kucheza. Tukienda kwenye Kombe la Dunia naamini watazidi kujifunza na kupata uzoefu zaidi," alisisitiza Reid, akifafanua kuwa lengo kuu ni kuendelea kuwajengea uwezo wachezaji hao.