MANJI ACHUKUA FOMU YANGA NA KUAHIDI MAKUBWA ZAIDI

MWENYEKITI wa klabu ya Yanga, Yusuph Manji amechukua fomu ya kuendelea kutetea nafasi hiyo katika Uchaguzi unaotarajiwa kufanyika Juni 11.

Manji ambaye anakubalika kwa wanachama wa klabu hiyo aliambatana na makamu Mwenyekiti wa klabu hiyo Clement Sanga katika zoezi la uchukuaji wa fomu huku mamia ya wapenzi wa Yanga wakilipuka kwa furaha.

Manji amewambia waandishi wa Habari pamoja na wanachama wa timu hiyo waliohudhuria katika makao makao makuu ya klabu kuwa anataka kuendelea kuongoza kwa ajili ya maendeleo ya Yanga.

"Nachukua fomu hii nikiwa na machungu na maendeleo ya klabu hii na nia yangu ni kupata mafanikio zaidi ya hapa tulipofika," alisema Manji.
 Katika hatua nyingine Manji  amemsimamisha uanachama Mwenyekiti wa matawi ya klabu hiyo, Mzee Mohammed Msumi baada ya kugundulika kutaka kuhujumu mchakato wa uchaguzi kwa kushirikiana na baadhi ya viongozi wa TFF na BMT.

Manji alitoa ushahidi wa sauti iliyosikika Mwenyekiti huyo akipanga mikakati ya kukatwa jina la Manji katika Uchaguzi ili kumrejesha katibu mkuu wa zamani, Jonas Tiboroha.

"Kwa mamlaka niliyonayo kama Mwenyekiti nimemsimamisha uanachama Msumi kwa kupanga hujuma dhidi yangu katika Uchaguzi huu," alisema Manji.