SIMBA YAZINDUA KADI ZENYE BIMA YA MAISHA

Rais wa Simba, Evans Aveva (katikati) Makamu wa Rais Simba Geofrey Kaburu (kulia) na Afisa Mtendaji wa EAG Group, Imani Kajula (kushoto) wakiwa wameshika mfano wa kadi mpya za kisasa za  wanachama ambayo mwanachama akiwa nayo anaweza kupata bima ya maisha baada ya kuizindua jana jijini Dar es Salaam

Baadhi ya watoto ambao ni mashabiki wa Simba wakiwa wameshika kadi maalum kwa ajili ya watoto ambao zilizinduliwa jana, kadi hii inamtambua mtoto kama mwanachama na pia kupata punguzo kubwa au kuingia bure kwenye matukio yatakayoandaliwa na Simba Sports Club.

KLABU ya Simba imezindua kadi mpya za uanachama ambazo zitatoa  fursa kwa watakaojiunga kunufaika na bima ya maisha.

Akizungumza leo kwenye uzinduzi huo Rais wa Simba Evans Aveva alisema kila mwanachama atakayejiunga na kuchukua kadi mpya atapata bima ya maisha inayojulikana kama Simba pamoja.

Alisema bima hiyo ambayo hupatikana kwenye tovuti ya Simba itampatia mwanachama ambaye amelipa malipo yake ya mwaka ya uanachama jumla ya Sh. 250,000 ikiwa atapata msiba wa kwake, mwenza wake au mtoto.

Kwa mujibu wa Aveva, malipo ya uanachama ni sh. 1000 kwa mweli hivyo ikiwa mwanachama atalipa ada ya mwaka sh.  12,000 kwa wanachama hai na sh. 30,000 kwa wanachama wapya ndipo atanufaika na bima hiyo ya simba pamoja.

“Faida hii ya huduma ya Simba pamoja itamwezesha mwanachama wa samba kupata mkono wa pole apatapo msiba. Hii ndio klabu pekee Afrika Mashariki inayotoa fao hili kwa wanachama, Simba inajali sana wanachama wake,”alisema.

Aveva pia, alizindua kadi ya simba cubs kwa ajili ya watoto wanaoipenda timu hiyo ili kuwawezesha kutambuliwa na kuwa wanachama wa timu hiyo.

“Kadi ya Simba cubs itawawezesha watoto sio tu kutambuliwa kuwa mwanachama wa samba, bali pia kupata punguzo kubwa au kuingia bure kwenye matukio yanayoandaliwa na Simba na kwenye maduka yatatoa punguzo kwa watoto wenye kadi hizo,”alisema.

Ateua baraza la wazee

Katika hatua nyingine Aveva alitangaza  baraza la wazee aliloliteua kwa ajili ya kuwashauri mambo mbalimbali ya klabu.

Baraza hilo linaongozwa na Mwenyekiti Omary Mtika na wajumbe ni Ally Hassan, Abdulsharif Zahoro, Chuma Suleiman na Omary Moshi.

Wakati huo huo, Mtendaji Mkuu wa Kampuni ya EAG Group ambaye ni mwezeshaji wa klabu hiyo Iman Kajuna alisema upatikanaji wa kadi hizo ni moja ya majukumu yao waliyowekeana awali katika kuhakikisha wanabuni mbinu zitakazoisaidia klabu hiyo kupata mapato.

Alisema wanachana wanaohitaji kujiunga wanatakiwa kuomba maombi ya kupata kadi kupitia tovuti ya klabu hiyo www.simbasport.co.tz na kwamba kadi hizo zina uwezo wa kutunza kumbukumbu.