BENDI YA EXTRA BONGO YASIMAMISHA WAILI KWA UTOVU WA NIDHAMU

 

BENDI ya Extra Bongo, ‘Wazee wa kizigo’ imewasimamisha wanamuziki wake wawili kwa kosa la utovu wa nidhamu.

 Wanamuziki  waliosimamishwa ni rapa Frank Kabatano na mwimbaji Redo Mauzo

baada ya kwenda Mbeya kujiunga na TOT Plus kwa ajili ya sherehe za CCM kutimiza miaka 37 bila ruhusa ya uongozi wa Extra Bongo.

Akizungumza jijini, msemaji wa bendi hiyo Juma Masesa alisema kuwa wanamuziki hao wamesimamishwa kwa muda usiojulikana kwa kosa la utovu wa nidhamu kwani walikwenda Mbeya bila ya ruhusa ya uongozi.

“Wana muziki Frank Kabatano ambaye ni rapa na  Redo Mauzo ambaye ni mwimbaji wamesimamishwa kwa utovu wa nidhamu kwani waliondoka kwenda Mbeya kufanya shoo na bendi ya TOT Plus bila uongozi kuwa na taarifa”, alisema Masesa.

Kwa sasa Ally Choki "Mzee wa Farasi" anarapu mwenyewe kwenye shoo za Extra Bongo japo rapa Ngosha Masanja ambaye alipata kuwa na bendi ya Tamarin Band, Vibration Sound na Mashujaa Band yupo kwenye majaribio na bendi hiyo

Extra Bongo itakuwa haina mwanamuziki yoyote Mcongo baada ya kuachana na Papii Catalogue mkataba wake ulipomalizika.

Kabatano ana sifa ya kumudu vizuri rapu ya bendi hususan baada ya Extra Bongo kuachana na Grayson Semsekwa aliyekwenda Twanga Pepeta na Saulo Fergusson aliyehamia Mashujaa Band.