MSUVA: LUGHA TATIZO MOROCCO

 

MCHEZAJI wa kimataifa wa Tanzania anaeichezea klabu ya Difaa El Jadid ya Morocco, Simon Msuva  amesema anapata tabu kwenye lugha kwani nchi hiyo wanazungumza sana Kiarabu na Kifaransa kidogo.

Msuva ambaye alitua nchini jana usiku kwa ajili ya mchezo wa kirafiki wa kimataifa dhidi ya Botswana unaotarajiwa kuchezwa Jumamosi kwenye Uwanja wa Uhuru, Dar es Salaam alisema Morocco ni nchi ya kiarabu na yeye hajui Kifaransa wala Kiarabu lakini kwa sababu lugha ya mpira ni moja uwanjani wanaelewana.

“Lugha za mazungumzo nitajifunza taratibu kwa sababu nina miaka mitatu pale. Yupo ‘psychologist’ ambaye anajua Kiingereza kidogo na ameniahidi kunitafutia mwalimu wa kunifundisha kiarabu na Kifaransa,” alisema Msuva.

Pia Msuva alisema kocha wake wa Jadid amembadilishwa nafasi ya kucheza kutoka namba 9 uwanjani lakini hakujamwathiri chochote kwani kama mchezaji kocha anaweza kuona unafaa kucheza nafasi gani kulingana na mfumo wake.

“Hapa nilikuwa nacheza kama kiungo mshambuliaji nikitokea pembeni kushoto au kulia ni kocha tu anaamua anitumiaje kulingana na mfumo wake. Kocha wangu wa Jadid ameona nafaa kwenye umaliziaji na niko vizuri kwenye ‘movement’ aliniambia aliniona mara kadhaa na akasema anahitaji kuona uwanjani kile alichokuwa akikiona kwenye picha mjongeo ‘video’,” alisema Msuva.

Msuva alisema katika mechi alizocheza ameonesha uwezo wake hadi sasa anacheza kama namba 10 lakini pia anacheza nafasi yoyote ya mbele kwa sababu anahitaji kufunga na pia anahitaji kutengeneza nafasi tangu akiwa mdogo alikuwa anacheza namba 9 au 10.

Msuva alisema kuna vyakula amekutana navyo kule huku alikuwa anaringa kula lakini kule inabidi ale na wao wanasisitiza kula kwa sababu wanasema vinamjenga mchezaji endapo utazingatia kula kwa wakati na kusema anakosa ugali wa dona

Aidha Msuva alisema alipofika alipokelewa vizuri na ameweza kufanya kitu ambacho wao wenyewe wameona anafaa kuwa pale kwa hivyo hakuna tofauti sana na Tanzania.

Msuva alisema malengo yangu ni kusogea zaidi kwa sababu ligi ina ushindani ila hadi sasa amecheza mechi 11 na amefanikiwa kufunga mabao tisa