Blogroll

KWA MAWASILIANO ZAIDI TUWASILIANO KUPITIA BARUA PEPE pallangyorachel@yahoo.com AU NIPIGIE KUPITIA NAMBARI 0715187511

Pages

Sunday, May 21, 2017

ARSENAL MTEGONI LEO PAZIA LA LIGI KUU ENGLAND, LIVER NA MAN CITY SI SALAMA



PAZIA la Ligi Kuu ya England (EPL) msimu wa 2016/17 linafungwa leo, ambapo ni timu mbili tu zimeshajua kwa yakini kwamba zimefuzu kucheza Ligi ya Mabingwa Ulaya (UCL) lakini tatu za mkiani zimeshajihakikishia kushuka daraja.
Kila mmoja amevuna kwa kadiri alivyopanda, bila shaka zikichanganywa humo bahati njema na mbaya kwa wengine na ni wazi kuna watakaokuwa wakionesha au kuoneshewa vidole kutokana na mienendo ya timu hadi ligi inamalizika.
Mabingwa ni Chelsea wanajulikana na washindi wa pili ni Tottenham Hotspur – zote klabu za hapa hapa jijini London, furaha iliyoje kwa wana wa jiji hili!
Kama kuna kitu kinafuatiwa kwa makini Jumapili ya leo basi ni mechi tatu tu. Moja ni ya Arsenal dhidi ya Everton, lakini wanaotazama huko watakuwa wakirusha macho kwenye mechi baina ya Liverpool na Middlesbrough pale Anfield bila kusahau ile ya Manchester City wanaokaribishwa Watford.
Upo uwezekano wa kutokea Liverpool na Arsenal kuja kucheza mechi yao katika ligi yap eke yao, ili kuchagua nani miongoni mwao asonge mbele. Jamaa hawa wanaweza kukutana, lakini City ambao wanashika nafasi ya tatu wasidhani kwamba wapo salama sana, japokuwa wanahitaji pointi moja tu.
Arsenal wana pointi 72, moja pungufu ya Liverpool na tatu nyuma ya Man City. Arsenal wanashika nafasi ya tano, Liverpool wa nne na City wa tatu. Kwa hiyo leo ni vita ya timu hizi tatu kuwania kwenda kwenye mashindano makubwa zaidi Ulaya – UCL. Timu moja itakosa, na italia, itatupwa ligi ndogo ya Ulaya – Europa League.
Man City wapo mbele kwenye mbio hizi za farasi watatu na wana nafasi kubwa ya kufuzu moja kwa moja ikiwa watafanya kile washabiki wao wanachotaka leo hii wakati Liver nao uwezekano wa kufuzu kwa nafasi ya nne upo mikononi mwao wakati Arsenal ni ile ya fisi kusubiri mkono wa mwanadamu udondoke ndipo aule.
Ndio kusema Arsenal hawana uamuzi na hatima yao, bali ni watu wa kupigana washinde, lakini wakishashinda wategemee na matokeo ya watu wengine; licha ya jitihada zao wanahitaji kusaidiwa na ama Middlesbrough au Watford kwa kuwafunga wapinzani wao hao.
Kwa hali ilivyo, kuna uwezekano kwamba leo haitakuwa siku ya mwisho ya msimu; ni kama unaposema unaenda kuvunja kamati ya sherehe fulani lakini ikakwama kuvunjika kwa sababu fulani.
EPL nayo inaweza isimalizike leo na makocha Pep Guardiola, Jurgen Klopp na Arsene Wenger wakaachwa wakitowelea juu ya hatima ya muhula wao kwa muda zaidi kidogo, ikitokea yoyote kati ya timu zao inamaliza ligi ikiwa na rekodi zinazofanana na mahasimu wao.
Hiyo itatokea iwapo timu husika zinafungana kwa pointi, mabao ya kufunga nay ale ya kufungwa. Ikitokea hivyo kwa Arsenal na Liver itamaanisha kwamba timu hizo zitakutana kwa mara ya tatu msimu huu badala ya mbili za kawaida na wakitoshana nguvu basi penati kwa ajili ya kuamua.
Hapana ubishi kwamba Arsenal wanakabiliwa na mtihani mgumu zaidi – kucheza dhidi ya Everton, hata kama ni Emirates. Hawa ndio walianza kuwatibulia msimu kwa kuwafunga Arsenal kule Goodison Park. Itakuwaje basi ili timu hizi zikutane kwenye mechi ya ziada ya mtoano? Nifuatilie:-

1.     Arsenal v Liverpool (kuwania nafasi ya nne)


Arsenal na Liverpool wanaweza kuja kukwaana na Liverpool iwapo watamaliza kwa idadi sawa ya rekodi kama nilivyotaja hapo juu. Itakuwa hivyo ikiwa Liverpool watafungwa 2-0 na Middlesbrough huku Arsenal wakienda sare ya 1-1 na Everton. Pia watamaliza wakiwa na rekodi sawa ikiwa Liverpool watafungwa 3-1 na Arsenal kwenda sare ya 2-2 na Everton. Ngoma inogile.


2. Liverpool v Manchester City (kuwania nafasi ya tatu)

Liverpool na Manchester City watamaliza wakiwa sawa kwa takwimu iwapo Man City watakwenda sare ya 3-3 huku Liverpool wakiwafunga Middlesbrough 3-0. Pia watatoshana nguvu ikiwa City wataenda sare ya 4-4 huko Vicarage Road huku Liverpool wakishinda mechi yao kwa mabao 4-1, na kadhalika.

3. Arsenal v Manchester City (kuwania nafasi ya nne)

Arsenal na Manchester City watamaliza wakiwa na rekodi za kufanana iwapo Arsenal watawafunga Everton 1-0, Manchester City wapoteze 4-0 kwa Watford na Liverpool wawafunge Middlesbrough. Pia watamaliza wakiwa na alama zote sawa iwapo Arsenal wanashinda 2-1 na City kufungwa 5-1, na mikokotoo mingine ya namba kwa tofauti ya mabao kama hivyo. 
Kwa msingi wa niliyoyaweka hapo juu, ni kwamba kila moja kati ya klabu hizi tatu inakabiliwa na uwezekano wa kumaliza kwa idadi sawa na mwenzake na hivyo kutakiwa kujiandaa kwenda kwenye uwanja huria kucheza kujipanga upya, hali hiyo ikionekana kunukia zaidi kwa Liverpool na Arsenal.
Je, hii itakuwa moja ya zile siku ambazo The Reds, yaani Liverpool hujikwaa bila kutarajiwa? Je, Wenger atafanikiwa kuendeleza mserereko wa kuwa ndani ya UCL mfululizo au ndio mwisho mchungu? Kujiamini kwa Guardiola kunamaanisha anavuka au bado anaweza kuwa nje ya UCL? Ameshaweka rekodi mbaya ya kukosa kikombe chochote kwa mara ya kwanza tangu aanze ukocha.