MANCHESTER UNITED YAFUNGWA 2-1 NA MAN CITY

 
 
 
KOCHA wa Manchester City, Pep Guardiola leo amepata ushindi wa kwanza kwenye Ligi Kuu dhidi ya kocha mzoefu wa ligi hiyo, Jose Mourinho wakati timu yake ilipocheza na Manchester United.

Katika mechi hiyo iliyochezwa kwenye uwanja wa Old Trafford, Manchester City ilistahili kuondoka na ushindi wa mabao 2-1 kutokana na kuonesha kiwango kikubwa.

Kevin de Bruyne alifunga bao la kuongoza kwa City katika dakika ya 15 kabla Kelechi Iheanacho hajafunga la pili katika dakika ya 36.

Baada ya bao hilo, City ilimiliki mpira karibu kwenye idara zote dhidi ya kikosi cha Mourinho Manchester United kwa karibu dakika zote 45 za kipindi cha kwanza.

United ilionekana kuzinduka dakika tatu kabla ya mapumziko kwa bao la Zlatan Ibrahimovic lililotokana na makosa ya kipa wa City.

Ushindi huo unamfanya Guardiola kuwa kocha wa nne kushinda mechi nne za mwanzoni mwa msimu katika Ligi Kuu, kabla yake alifanya hivyo Mourinho, Guus Hiddink na Carlo Ancelotti.

Upinzani wa muda mrefu kati ya kocha wa zamani wa Real Madrid, Mourinho na kocha wa zamani wa Barcelona, Guardiola ulimaanisha kwamba mechi hii ilikuwa ikisubiriwa kwa hamu na mashabiki wa soka tangu ratiba ya ligi ilipotangazwa.

Baada ya mechi hiyo kocha wa Manchester City, Guardiola alisema: "Tunafuraha, nadhani watazamaji wamefurahia, kipindi cha kwanza tulikuwa wazuri lakini kipindi cha pili mechi ilikuwa ngumu, tulishambulia lakini hatukumalizia nafasi,”.

Naye kocha wa Manchester United, Mourinho alisema: "Vipindi viwili vilikuwa tofauti kabisa, katika kipindi cha kwanza hatukuwa kwenye kiwango cha kucheza mechi, kipindi cha pili kilikuwa tofauti kabisa, tulikuwa timu ambayo tulistahili kubadili matokeo, tulistahili kupata bao kipindi cha kwanza,”.

mwisho.