TFF YAIKOMALIA YANGA KUFANYA UCHAGUZI

SHIRIKISHO la Soka Tanzania, (TFF) limeikomalia klabu Yanga kuheshimu katiba na kuahakikisha wanafanya uchaguzi mapema.

Akizungumza na wandishi wa habari jana,Rais wa Shirikisho la Soka Tanzania (TFF) Jamal Malinzi alisema Yanga waliwaandikia barua Agosti, 2015 wakiomba kuahirisha uchaguzi ili kupisha Uchaguzi Mkuu wa Rais na Wabunge uliofanyika Octoba 30, 2015 lakini hadi sasa wamekaa kimya.

“Kati ya wanachama 44 wa shirikisho hilo hakuna mwanachama anayemzidi mwenzake hivyo Yanga kuacha kufanya uchaguzi ni kuvunja katiba ya TFF, CAF na FIFA hivyo nitahakikisha uchaguzi wa Yanga unafanyika mapema iwezekanavyo”, alisema Malinzi

Kauli ya TFF imekuja baada ya muda wa kukaa madarakani kikatiba kumalizika toka June 2014 na kuongezewa mwaka mmoja na mkutano Mkuu wa wanachama ili kufanya marekebisho ya katiba ya klabu hiyo  lakini hadi sasa wapo kimya.

Mapema wiki hii, Ofisa Habari wa Yanga, Jerry Muro alisema uongozi wa klabu hiyo umemchagua Wakili Sam Mapande kuwa Makamu Mwenyekiti wa kamati ya Uchaguzi.

Mapande amechukua nafasi ya Alex Mgongolwa aliyejiuzulu kutokana na kuwa na majukumu mengine na kwamba Mwenyekiti huyo ataitisha kikao cha Kamati ya Uchaguzi na ndicho kitakachokuwa na jukumu la kupanga tarehe ya uchaguzi wa Yanga