AZAM FC YAFUNGA USAJILI WA NDANI

KLABU ya Azam FC imesema kuwa kwa sasa imesitisha usajili wa wachezaji wa ndani baada ya kumchukua mchezaji Ame Ally kutokea Mtibwa Sugar.

Timu hiyo ilimaliza Ligi Kuu msimu uliopita ikiwa nafasi ya pili na kwa sasa imekuwa ikijipanga kufanya usajili mzuri kwa lengo la kushinda msimu ujao.

Akizungumza na gazeti hili jana Msemaji wa Klabu hiyo Jafa Idi Maganga alisema kuwa klabu imefanya usajili mzuri kwa wachezaji wa ndani na kuwa haina wasiwasi kwa msimu ujao.

Alisema kuwa klabu inaamini kuwa wapo wachezaji wengine wazuri na waliokuwa wakitaka kusajiliwa na klabu hiyo lakini kutokana na uchache imewachukua iliyoridhika nao na kuwataka wengine wenye nia ya kuitaka timu hiyo kujipanga kwa msimu ujao.

"Ndio tumemalizana na huyu Ame Ally na amejiunga nasi siku chache zilizopita na tumefunga usajili lakini bado muda na nafasi kwa siku zingine zipo wachezaji wasitususe"alisema Maganga.  

 Pia alisema kuwa klabu inasubiria uamuzi wa Shirikisho la Mpira wa Miguu Tanzania (TFF) kuhusiana na kuongeza idadi ya wachezaji wa kigeni ili kuona ni kiasi gani wanaweza kuongeza wachezaji wengine.

Alisema kuwa kwa sasa wameshakamilisha idadi ya wachezaji inayotakiwa ambayo ni wawachezaji watano wa kigeni na kuwa iwapo ikiruhusiswa kuongeza inawachukua wachezaji ambao imeshafanya nao mazungumzo.

"Najua kwa wachezaji wa nje ni watano na kuwa kwa sasa wapo wachezaji kama akina Bamidele Tope wa Nigeria na wengineo lakini ifahamike kuwa kwa sasa hatuwezi kusema lolote kuhusiana na mchezaji huyo" alisema Maganga.

Aliongeza kuwa " hakuna haja ya kumzungumzia huyu kwa sasa kwa kuwa kuna mchakato wa kuangalia uwezekano wa kuongezea idadi ya wachezaji wa kigeni, ila idadi ikiongezwa basi wapo wengi".

Klabu tatu kubwa nchini, Yanga, Azam na Simba zilituma maombi kwa TFF kuomba kuongezewa idadi ya wachezaji wa kigeni kutoka watano kufikia 10. Na kwa sasa kinachosubiriwa ni maamuzi ya Kamati ya Utendaji ya TFF.