KABALI YA BRANISLAV IVANOVIC KWA McCARTHY YACHUNGUZWA NA FA, KOCHA MARTINEZ ASEMA ILISTAHILI KUWA RED CARD

Jumatano Usiku huko Stamford Bridge baada ya Chelsea kushinda 1-0 na kuendelea kuongoza Ligi Kuu England wakiwa Pointi 7 mbele ya Mabingwa Watetezi Manchester City.
Chelsea walipata Bao lao la ushindi Dakika ya 89 kwa Mkwaju wa Willian uliombabatiza Naismith na kutinga lakini hilo lilikuja baada ya Kiungo wa Everton, Gareth Barry, kupewa Kadi Nyekundu ambayo ilisababisha vurumai kati ya Wachezajii na Beki wa Chelsea, Branislav Ivanovic, hakuchukuliwa hatua yeyote licha kuonekana kumpiga kabali James McCarthy na kisha kumgusa na Kichwa.
Zogo hilo limemfanya Meneja wa Everton, Roberto Martinez, awashambulie Chelsea na kudai Wachezaji wao humsakama Refa ili kutoa maamuzi upande wao.
Alisema: “Ni wazi Timu ya Nyumbani wanajaribu kumrubuni Refa.”
Martinez aliongeza: “Kumpa Kadi ya Njano ya Pili Gareth Barry kwa sababu ya Wachezaji wa Chelsea kumsakama Refa, inasikitisha! Hiki ni kitu tunakiona mara kwa mara hapa. Lazima Wahusika waliangalie hili!”
Pia Roberto Martinez alizungumzia kuhusu Ivanovic na kusema: “Ivanovic alifanya makosa. Alimpiga kabali ya nguvu McCarthy na kisha kumwekea Kichwa. James McCarthy hakujibu chochote. Kama unazingatia Sheria, ile ni Kadi Nyekundu na hatukupata uamuzi huo!”