HAWA MTAANI WANAITWA "BIG" KWENYE SOKA VIBONGE

MTAANI wanaitwa ‘big’, kwenye soka tunawaita ‘vibonge’, hapa tunawazungumzia watu wanene, ambao kila kona wana majina ya utani ambayo wanatungiwa kutokana na miili yao. Mchezaji wa soka anatakiwa kuwa fiti, mkakamavu na mwepesi ilikuweza kukimbizana na kupambana muda wote uwanjani.

Lakini kuna baadhi ya wachezaji kutokana na vipato vikubwa wanavyovipata, kuendekeza starehe na kusahau mazoezi, wamejikuta wakiumuka na kuongezeka uzito, jambo ambalo limesababisha mashabiki wa soka kuwatungia jina la ‘vibonge’, kama angekuwa siyo mcheza soka tungesema ‘big’.

Kuna wachezaji wamelazimika kuachana na soka mapema kwa sababu ya ubonge, hivyo kujikuta wakishindwa kuendana na kasi ya soka kwa dakika 90 uwanjani. Makala haya yanakuletea wachezaji watano vibonge kutokea kwenye soka, kuna wengine wamestaafu na kuna wale waliokomaa na mpaka sasa bado wanacheza.

 

Ronaldo de Lima

Mbrazil huyo ambaye mashabiki walimpa jina la utani la ‘o fenomeno’, kutokana na kasi yake na uwezo wa kufunga aliokuwa nao wakati akicheza, ni mfano mzuri wa wachezaji ambao walishindwa kujitunza na kujikuta akiwa kibonge. Soka lake lilianza kuporomoka baada ya kuanza kuandamwa na tatizo la kuongezeka uzito, ambapo watu wakaacha kuangalia mabao yake uwanjani na kujadili ukibonge wake.

Japokuwa aliendelea kufunga uwanjani na kuonyesha vile vitu ambavyo amekuwa navyo tangu alipokuwa kinda, lakini ubonge ulionekana kumuathiri na kuamua kuachana na soka kutokana na tatizo hilo, siku za karibuni amekuwa akishiriki kwenye kipindi cha televisheni cha nchini kwao Brazil cha kupunguza uzito, na kidogo anaonekana kupungua.

Adriano

Ilikuwa ngumu sana kuchukua mpira kutoka kwenye guu lake la kushoto kipindi alipokuwa kwenye kilele cha kiwango chake, kuna wakati picha yake ilitumika kutangaza magame ya video, lakini leo hii ukibonge umemfanya kuachana na soka akiwa na umri mdogo tu wa miaka 30 mwaka 2012.

Matatizo ya ukibonge yalimuanza pale alipogoma kuachana na maisha ya kujirusha, kuendekeza mademu na pombe. Ubonge wake, kupenda starehe, mademu na mtungi, kuliwahi kuilazimisha klabu yake aliyokuwa akichezea ya Corinthians kumzuia kutoka nje ya nyumba yake ili apunguze uzito, lakini hilo halikufanikiwa, akaishia kustaafu soka akiwa na miaka 30 tu.

 

Thomas Brolin

Msweden huyu ambaye alikuwa na sura ya kitoto, anakumbukwa kwenye ulimwengu wa soka kwa mambo matatu makubwa – kuiua England wakati wa michuano ya Euro mwaka 1992, kuchemka wakati akicheza Leeds United na ubonge wake uliopitiliza.

Tatizo lake la ubonge lilianza kuonekana kwenye mechi dhidi ya Liverpool mwaka 1995, kwa sababu tu hakuwa akipenda kukimbia kimbia uwanjani, kupanda na kushuka kutokana na kupangwa kwenye winga ya kulia, aliamua kucheza vibaya kwa makusudi ili timu yake ifungwe na kocha wake asimpange tena kama winga wa kulia. Na kweli siku hiyo Leeds ilichapwa mabao 5-0 na mwenyewe alikiri kucheza vibaya kwa makusudi.

 

Frank Lampard

Alipokuwa kijana mdogo, mashabiki wa timu pinzani waliwahi kumtungia jina la ‘Fat Frank’, wakimaanisha Frank Bonge, wengi wangeweza kuona kwamba Lampard hastahili kuwa kwenye listi hii, kutokana na umbo lake la sasa, lakini kwa wale waliomuona alipokuwa kinda wanajua jinsi gani tatizo la ubonge lilivyotaka kukatisha soka lake.

Mafanikio aliyokuja kuyapata ukubwani ni mfano wa kuigwa kwa vijana wadogo ambao wanataka kucheza soka, lakini ubonge kwao ndiyo tatizo, inaonyesha chochote mtu atakachoamua kufanya anaweza, cha msingi ni kuwa na nia ya dhati tu.

Ronaldinho Gaucho

Moja ya vitu vilivyoporomosha kiwango cha Ronaldinho, kutoka alipokuwa Barcelona na AC Milan na kumfanya kuamua kurudi kwao Brazil ni ubonge, Dinho alikuwa na tatizo la kuongezeka uzito na kupungua, jambo ambalo liliwafanya hata mashabiki wa AC Milan kumchoka.

Kwenye soka ubonge siyo kitu kizuri. Unamfanya mchezaji kukosa kasi na jambo hilo lilisababisha watu kumkosa Gaucho waliyekuwa wakimfahamu wa Barca, ambaye alikuwa na uwezo wa kuwapita mabeki kadri atakavyo kwa kasi na matendo ya ajabu, lakini uzito ulimfanya kukosa ile kasi ya kukimbizana na mabeki na alipopoteza mpira akawa mvivu kukaba.

Gaucho alijikuta akipoteza kujiamini, na kulazimika kurudi kwao Brazil, sasa hivi anaonekana kupungua uzito, lakini kiukweli ubonge ndio uliomng’oa Ulaya.