AVB AZIFANYIA KITU MBAYA CHELSEA NA ARSENAL NA CROUCH ASEMA YUPO GIZANI

 

LONDON, England

TIMU ya Tottenham imewafanyia kitu kibaya mahasimu wao jijini London, timu za Arsenal na Chelsea, baada ya kuzizidi maarifa na kufanikiwa kuwanasa makinda wawili kutoka nchini Croatia.

Klabu hizo mbili za  Chelsea na  Arsenal zilikuwa zikiwawania makinda wa timu ya Dinamo Zagreb, Alen Halilovic  na  Tin Jedvaj, wote wakiwa na umri wa miaka  17.

Hata hivyo, Andre Villas-Boas ndiye yupo mbioni kukubali kutoa kitita cha pauni milioni 17 ili kukamilisha usajili wa makinda hao wawili.

Kiungo mshambuliaji  Halilovic, msimu uliopita ndiye alikuwa mchezaji wa pili kushiriki michuano ya Klabu Bingwa Ulaya akiwa na umri mdogo na tayari ameshaonesha maajabu kwenye timu ya taifa ya Croatia ambayo yanamfanya afananishwe na nyota wa zamani Spurs, Luka Modric.

Kwa upande wake, beki wa kati, Jedvaj, yeye anakipiga kwenye timu ya taifa ya vijana wenye umri chini ya miaka 19 na msimu uliopita ameichezea Dinamo mechi 13.

Rais wa Dinamo, Mirko Barisic, alithibitisha usiku wa kuamkia jana kwamba makubaliano ya kuwasainisha nyota hao wawili yameshakamilika.

@@@@@@@@@@@

Crouch: Nipo gizani

LONDON, England

MSHAMBULIAJI, Peter Crouch, amesema kuwa hadi sasa yupo gizani kuhusu hatima ya kibarua  chake katika timu ya  Stoke City, chini ya kocha mpya,  Mark Hughes.

Nyota huyo alijiunga na na timu hiyo ya  Britannia  akitokea Tottenham misimu miwili iliyopita kwa kitita cha pauni milioni 10 na ana makataba hadi mwaka  2015.

Hata hivyo, Crouch, mwenye umri wa miaka  32, ambaye ameshachezea klabu 10 tofauti tangu aanze kusakata kandanda alisema jana: “Kutokana na historia yangu huwezi kufahamu.

“Kamwe sijawahi kuwa na mawasiliano ya mara kwa mara na Mark Hughes.

“Lakini nakumbuka nilimuona akiwa  Chelsea. Natarajia kufanya naye kazi,” aliongeza nyota huyo.