MASTAA 10 ADIMU SOKONI ULAYA

LONDON, England

AMSHA amsha za usajili zimeanza Ulaya, kila timu inatafuta mchezaji kwa ajili ya kuimarisha kikosi chake au kuziba mapengo yaliyoachwa wazi.

Julai 1 dirisha la usajili la majira ya kiangazi linafunguliwa rasmi na tayari Neymar, Radamel Falcao na Wilfried Zaha wamekamilisha usajili, lakini vipi kwa wale ambao bado?

LENZI YA MICHEZO  inakuletea wachezaji 10 wanaowaniwa zaidi kwenye dirisha la usajili la Kiangazi.

Isco (Malaga na Hispania)

Anatarajiwa kumfuata Manuel Pellegrini, Etihad baada ya misimu miwili Malaga, Isco, ni kiungo mshambuliaji anaungana na watu wanaocheza kama yeye, Samir Nasri na David Silva. Ana uwezo mkubwa sana wa kupita mabeki, lakini swali ni je, atasalimika kwenye soka la nguvu la England? Hilo tunasubiri kuona, atawabeba sana Manchester City kwenye Ligi ya Mabingwa Ulaya.

Thamani: Pauni milioni 27

Wanaomtaka: Manchester City

Wayne Rooney (Manchester United na England)

Mustakabali wa Rooney Manchester United ni utata mtupu, kwa sasa yuko kwenye mazungumzo na kocha mpya wa Old Trafford, David Moyes. Kama Rooney ataondoka basi klabu kibao zitamtolea macho na vita itaanzia hapo. Hata hivyo, hamu ya Rooney kuondokana na presha na kuelekeza nguvu zake kwenye soka ni muhimu sana.

Thamani: Pauni milioni 30

Wanaomtaka: Manchester City, Chelsea, Arsenal, PSG, Real Madrid

Cesc Fabregas (Barcelona na Hispania)

Ndoto aliyokuwa nayo Fabregas ya kurudi Barcelona na kufanikiwa miaka miwili iliyopita, haijatimia, msimu huu amecheza mechi 32 na kufunga mabao 11 na kutengeneza mengine 11, kitu ambacho siyo kibaya kwa nahodha huyo wa Arsenal. Mashabiki wa England wanajua uwezo wa Mhispaniola huyo, lakini klabu za Manchester City na Manchester United zinaweza kuwa zimefedheheshwa na hamu ya Fabregas kuendelea kubaki Nou Camp wakati huu wa Kiangazi.

Thamani:  Pauni milioni 35

Wanaomtaka: Manchester City, Manchester United

Gareth Bale (Tottenham Hotspur na Wales)

Staa huyo wa Wales ndiye bidhaa adimu zaidi kwenye ulimwengu wa soka la Ulaya na kwa sasa anaweza kuzua vita ya klabu nyingi kumtaka. Anawaniwa sana na Manchester United ili kuziba pengo ambalo liliachwa wazi na Cristiano Ronaldo mwaka 2009. Lakini Real Madrid ndio wanazungumza sana kuhusu winga huyo mzaliwa na Cardiff. Pamoja na hamu kubwa ya Andre Villas-Boas kumbakiza, usajili wa fedha nyingi utakuwa mzuri kwake.

Thamani: Pauni milioni 80

Wanaomtaka: Real Madrid, Chelsea, Manchester City, Manchester United

Luis Suarez (Liverpool na Uruguay)

Mtata huyu wa Uruguay anaweza kuwa mmoja kati ya wachezaji wenye vipaji sana duniani, lakini Liverpool wanaweza kumruhusu aondoke kwa dau la pauni milioni 40. Suarez amekuwa akiwaambia wanahabari wa nchini mwake kuwa watu wanamuonea sana England. Lakini kashfa za kumbagua Patrice Evra na kumng’ata Branislav Ivanovic kumeharibu uhusiano wake na mashabiki wa Liverpool.

Thamani: Pauni milioni 40

Wanaomtaka: Real Madrid, Atletico Madrid, Juventus, PSG

Edinson Cavani (Napoli na Uruguay)

Kwa msimu wa pili mfululizo, Cavani amekuwa akihusishwa na kuondoka Napoli, staa huyo mwenye miaka 26 msimu uliopita alifunga mabao 40 akiwa na klabu yake na timu ya taifa na yupo kwenye mipango ya Ligi ya Mabingwa msimu ujao ya Napoli, lakini kuondoka kwa Ezequiel Lavezzi kwenda PSG mwaka jana, kulimkera Cavani. Kama Edin Dzeko akifanikiwa kulazimisha kuhama Manchester City, basi Cavani anaweza kuondoka.

Thamani: Pauni milioni 54

Wanaomtaka: Manchester City, PSG, Chelsea

Leighton Baines (Everton na England)

Wakati kiwango cha Patrice Evra kikionekana kuporomoka kila kukicha na ujio wa David Moyes, Old Trafford mtu huwezi kukosea ukimuhusisha Leighton Baines kujiunga na Manchester United. Baines amekuwa kwenye kiwango cha hali ya juu katika misimu miwili iliyopita na amekuwa muhimu kwa Everton, japokuwa beki huyo wa kushoto mwenye umri wa miaka 28, haendani na mfumo wa Man United wa kusajili wachezaji wenye umri chini ya miaka 26, lakini atakuwa na faida sana kwao kama akisajiliwa.

Thamani: Pauni milioni 15

Wanaomtaka: Manchester United

Christian Benteke (Aston Villa na Ubelgiji)

Mabao yake 19, yameibakisha Aston Villa kwenye Ligi Kuu England na yalitosha kuzivutia klabu kadhaa kubwa. Benteke (22) mwenye uwezo wa kupiga vichwa, mashuti na kucheza peke yake mbele, vinamfanya kuwa mtu muhimu kwa Ubelgiji kuelekea kwenye Kombe la Dunia mwakani na sasa hivi mchezaji huyo anahitaji kupata mechi zenye ushindani zaidi, ili abaki kwenye fomu itakayombeba mwakani nchini Brazil.

Thamani: Pauni milioni 17.5

Wanaomtaka: Atletico Madrid, Tottenham, Liverpool

David Luiz (Chelsea na Brazil)

Tatizo kubwa la Luiz chini ya Jose Mourinho, itakuwa kuendana na mfumo wake, Mbrazil huyo amekuwa na msimu mzuri sana na kama Mourinho atamuachia itatokana na aina yake ya uchezaji na siyo uwezo. Uwezo wake wa kukaba umekuwa ukizua maswali tangu alipojiunga na Chelsea kutoka Benfica mwaka 2011, lakini anaweza kufaa kwenye mfumo wa Barcelona.

Thamani: Pauni milioni 35

Wanaomtaka: Barcelona, Napoli

Wesley Sneijder (Galatasaray na Uholanzi)

Kipara chake kinawafanya watu kusahau kuwa Sneijder ndiyo kwanza anaumri wa miaka 28 na bado ni mmoja kati ya viungo washambuliaji bora zaidi duniani. Kiwango chake akiwa na Galatasaray kwenye Ligi ya Mabingwa Ulaya, vilithibitisha kuwa bado anaweza kutawala kiungo na Jose Mourinho anajua ubora wake baada ya kufanya naye kazi alipokuwa Inter Milan.

Thamani: Pauni milioni 7

Wanaomtaka: Chelsea