SAFARI YA NEYMAR KUTUA BARCELONA

NEYMAR (21), ametua rasmi Barcelona wiki hii, kinda huyo amekuwa akitawala vyombo vya habari na kugombaniwa na klabu nyingi tangu alipoanza kuvuma akiwa na Santos mwaka 2009.

Uvumi wa kila aina ulitawala sakata lake la usajili, huku dunia ikijaribu kutabiri iwapo Neymar ataondoka nyumbani kwao Brazil kabla ya Kombe la Dunia 2014.

Sasa hivi ametua rasmi Camp Nou, swali linakuja je, lini Barcelona walianza kuwania saini ya Neymar? Je, ni kweli kuwa Barcelona walimsajili miaka miwili iliyopita? Kwa nini amechagua Camp Nou?

Makala haya yanaangalia safari ya Neymar hadi alipotua Barcelona.

Akiwa na miaka 13 alifanya majaribio Real Madrid

Neymar amekuwa akizivutia timu kubwa barani Ulaya kwa muda mrefu sasa, akiwa na miaka 13 aliwahi kufanya majaribio na Real Madrid.

Baba yake Neymar alisema kwamba, mwanaye alialikwa Real Madrid na kila kitu kilikuwa poa, lakini inasemekana matatizo ya kimkataba yalimzuia Neymar kutua Santiago Bernabeu.

Kushindwa kwa Madrid ni faida kwa Barca miaka kadhaa mbele.

Mechi ya kwanza Santos

Mwaka 2009, Neymar alicheza mechi yake ya kwanza akiwa na Santos, kwenye michuano ya Brasileirao, wiki moja baadaye alifunga bao dhidi ya Mogi Mirim.

Neymar alifunga mabao 13 kwenye msimu wake wa kwanza na Santos akiwa na miaka 17 tu. Neymar alithibitisha kuwa ni moto wa kuotea mbali kila alipoingia uwanjani.

Watu walianza kumtabiria makubwa kwenye msimu wake wa kwanza Santos.

Ubingwa Santos, England wamtolea macho

Neymar alifunga mabao 17 kwenye mechi 31 za michuano ya Campeonato Brasileirao akiwa na Santos mwaka 2010, mabao yake yalichangia kuipa Santos Ubingwa wa Jimbo la Sao Paulo.

Pia Neymar alipewa tuzo ya mchezaji bora wa mashindano. Hii ilizivutia timu za Ligi Kuu England, huku akipewa jina la The New Pele (Pele Mpya).

Kuliibuka uvumi kwamba, Neymar alitosa kujiunga na West Ham kwa ada ya pauni milioni 16, pia klabu kama Manchester City na Chelsea, nazo zilitajwa kuwania saini ya kinda huyo.

Kubaki na kupanda akiwa Santos

Mwaka 2010, Neymar alisaini mkataba mpya wa miaka mitano kuendelea kubaki Santos na kukataa kujiunga na Chelsea iliyokuwa tayari kuweka mezani dau kubwa.

Neymar alisema kwamba, fedha hazileti furaha na kusisitiza kuwa alikuwa na furaha kwenye klabu yake na alitaka hali iendelee kuwa hivyo, pamoja na kwamba uamuzi huo ulikuwa mgumu sana kwake.

Uamuzi wa Neymar kubaki Vila Belmiro akiwa na Santos, ulikuwa mzuri kwa klabu baada ya kushinda michuano ya Copa Libertadores mwaka 2011.

Hii ikiwa ni mara ya kwanza kwa klabu hiyo kunyakuwa taji hilo, tangu mwaka 1963 na ubingwa huo uliipa Santos nafasi ya kushiriki michuano ya Kombe la Dunia la Vilabu, fainali ya michuano hii ilizikutanisha Barcelona na Santos na hii ndiyo ilikuwa mara ya kwanza kwa Barca kukutana na Neymar.

Kombe la Dunia la Klabu: Santos vs Barcelona

Mwaka 2011, jina la Neymar lilitajwa kati ya majina 23 ya wachezaji waliokuwa wakiwania tuzo ya Ballon d’Or.

Lionel Messi pia alikuwa kwenye orodha hiyo, hivyo fainali ya Kombe la Dunia la Klabu, kati ya Santos na Barcelona ilipewa jina la vita kati ya Messi na Neymar.

Ilikuwa ni mara ya kwanza kwa Messi na Neymar kucheza kiwanja kimoja na Barca walishinda kwa mabao 4-0, jijini Yokohama, inasemekana Neymar alimwomba Pep Guardiola amsajili, baada ya mechi hiyo kuisha.

Wengi walitaja mechi hii kama mwanzo wa majadiliano kati ya Barcelona na Santos, inasemekana kuwa Barca walitoa kiasi cha euro milioni 10 kama malipo ya awali mwaka 2011, ili kumsajili rasmi Neymar mwaka 2014.

Uvumi washamiri

Licha ya mkataba kumbakisha Santos hadi mwaka 2015, huku kipengele cha kumruhusu kuondoka kikiwa ni euro milioni 45, miamba mikubwa barani Ulaya haikukata tamaa kwenye mbio za kumsajili.

Kwa mujibu wa vyombo vya habari, Barca walikuwa wakimfuatilia kwa karibu pamoja na timu nyingine nne kubwa za bara hilo, ikiwemo Juventus.

Kiwango cha Neymar kwenye michuano ya Olimpiki 2012 jijini London, kilizidi kumpandisha chati, alishinda tuzo ya Mchezaji Bora wa Mwaka wa Amerika Kusini, mwaka 2012.

Alikuwa kwenye tatu bora ya tuzo ya Ferenc Puskas, huku akifunga mabao 14 kwenye Ligi ya nyumbani akiwa na Santos.

2013 – Atua Barcelona

2013 ndio mwaka Barcelona walimpata mtu wao, baada ya miaka kibao ya kumfukuzia. Real Madrid waliibuka na kutaka kuwazidi kete, Barca kwa ajili ya saini yake wakiweka mezani dau ambalo lilikuwa mara mbili ya lile la Barcelona.

Lakini Neymar alichagua kujiunga na Barcelona, akitoboa juu ya kutua kwake Barca kupitia akaunti yake ya Instagram, mwisho wa wiki iliyopita.

Barcelona walithibitisha kwamba, Neymar amesaini mkataba wa miaka mitano Jumatatu kupitia mtandao wa klabu hiyo fcbarcelona.com.

Sababu ya Neymar kutua Camp Nou ni za kimichezo zaidi kuliko fedha, hii ni kwa mujibu wa kocha wa Barca Tito Vilanova.

Watu wanasubiri kuona kama Neymar ataweza kufanya vizuri barani Ulaya, hasa akicheza sambamba na watu kama Xavi Hernandez, Andres Iniesta na Messi.