HAPA SAMBA (NEYMAR) KULE BUNDASLIGA (MULLER)

Neymar

MARA kwa mara kinda kutoka Brazil, huibuka akiwa amejaliwa kipaji cha hali ya juu na kuanza kulinganishwa na Pele. Huyu ni mhitimu kutoka chuo cha soka cha Santos, amekuwa akitajwa mmoja kati ya wachezaji makinda wanaotarajiwa kuja kufanya makubwa sana ulimwenguni, aina yake ya uchezaji inafananishwa na Garrincha na ile ya Romario, japo bado yuko nchini kwao Brazil jina lake ni kubwa zaidi duniani kwa sasa.

THOMAS MULLER

UKUAJI wa kasi wa Thomas Muller kwa kiasi kikubwa anatakiwa kumshukuru kocha wa zamani wa Bayern Munich, Louis van Gaal, mtu ambaye alikuwa tayari kumuamini na kumpa mechi yake ya kwanza katika klabu hiyo msimu wa 2009-10, tangu hapo amekuwa moto wa kuotea mbali na ubora wake umethibitika wiki iliyopita kwa mabao yake mawili dhidi ya Barcelona.

UBORA WAO

Neymar: Ni mchawi akiwa na mpira mguuni kwake, kasi yake, uwezo wa kukokota mpira, umaliziaji mzuri na mbinu zake za hali ya juu zinamfanya awe mtu hatari kukutana naye. Ufahamu wake mkubwa wa soka na akili ya ziada uwanjani, vinamfanya aweze kucheza kama winga au mshambuliaji wa kati.

Muller: Anajua kwa nini ni mchezaji wa kulipwa na tabia yake ya upole, imemfanya awe na marafiki wengi, uwezo wake wa kuona mbali, ufundi na utulivu akiwa na mpira vinamfanya awe tofauti kabisa na wachezaji wengi.

UDHAIFU WAO

Naymer: Nidhamu yake inaanza kuzua maswali, kutokana na kuhusika kwenye matukio kadhaa ya kinidhamu, pia watu wamekuwa wakimlaumu kwa tabia yake ya uchoyo anapokuwa na mpira, pamoja na matumizi ya mchezo mbaya kwenye soka.

Muller: Bado anahitaji kukomaa zaidi na kuongeza ukakamavu zaidi kwa sababu kuna wakati hutoka nje ya mchezo.

KIPINDI KIZURI

Naymer: Mabao yake mawili dhidi ya Scotland, Machi 2011 ilifikisha idadi ya mabao yake kwenye timu ya taifa kufikia matatu kwenye mechi tatu na kutambulisha kipaji chake zaidi ulimwenguni.

Muller: Kushinda tuzo ya mchezaji bora kijana kwenye michuano ya Kombe la Dunia 2010, pia alishinda tuzo ya ufungaji bora wa michuano hiyo akiwa na mabao matano na kutengeneza mengine matatu.

KIPINDI KIGUMU

Naymer: Septemba 2010, Neymar alionyesha upande wake wa pili baada ya kuzua mzozo kwenye mechi dhidi ya Ceara, na baadaye kugombana na kocha Dorival Junior, baada ya kukatazwa kupiga penalti dhidi ya Guarani. Dorival alimuadhibu hilo liliukera uongozi na wakamtimua kocha huyo.

Muller: Msimu wa 2008-09 aliingia mara nne akitokea benchi, lakini alishindwa kujitengenezea namba.

STAILI YA UCHEZAJI

Naymer: Anasisimua, mbunifu, mgumu kumzuia na ni mshambuliaji hatari sana.

Muller: Anakasi, hatari, mpigaji mzuri wa pasi na anaona mbali.

KAULI

Neymar: “Ni vizuri kulinganishwa na mchezaji bora (Pele). Lakini baba yangu aliniambia kuhusu soka la Garrincha wakati akiwa anashambulia, anakokota mipira. Staili ya Garrincha inalingana na ya Neymar,” alisema Neymar, Januari 2011.

Muller: “Miezi 12 iliyopita nilikuwa nawaza kama naweza kuchezea Bayern kwenye Bundesliga. Lakini sasa hivi niko kwenye timu ya taifa  ni kama ndoto. Haiwezi kuwa bora zaidi ya hapa,” alisema Muller.

USICHOKIJUA

Neymar: Zaidi ya mashabiki 14,000 wa Brazil walitia saini karatasi ambayo ilikuwa ikimlazimisha Dunga kumuita Naymer kwenye kikosi kilichoshiriki Kombe la Dunia mwaka 2010 nchini Afrika Kusini.

Muller: Wakati wa Kombe la Dunia 2010, Diego Maradona alikataa kukaa kwenye mkutano na waandishi wa habari akiwa na Muller kwa sababu hakujua alikuwa mwanasoka. Lakini baada ya Ujerumani kuipiga Argentina 4-0, Muller alisema: “Linapokuja suala la Maradona, hii ni nzuri kwangu. Sidhani kama ataendelea kudhani kuwa mimi ni muokota mipira.

WASIFU

Neymar

• Jina Kamili: Neymar da Silva Santos Junior
• Namba ya jezi: 11
• Umri: Miaka 21
• Kuzaliwa: Februari 5, 1992
• Alikozaliwa: Mogi das Cruzes, Sao Paulo, Brazil
• Urefu: futi 5 na inchi 9
• Uzito: Kilo 60
• Klabu: Santos
• Taifa: Brazil

Thomas Muller

·        Namba ya Jezi: 25

·        Nafasi: Kiungo/Mshambuliaji

·        Umri: Miaka 23

·        Kuzaliwa: Septemba 13, 1989

·        Alikozaliwa: Weilheim, Ujerumani

·        Urefu: Futi 6.2

·        Uzito: Kilo 74

·        Klabu: Bayern Munich

·        Taifa: Ujerumani