FERGUSON HAMUWEZI MOURINHO

LONDON, England

BAADA ya kuwa kocha wa Manchester United kwa muda wa miaka 26, hatimaye wiki iliyopita, Sir Alex Ferguson aliamua kutangaza kwamba anaachia ngazi.

Hadi anatangaza kuachia madaraka, Ferguson alikuwa akitajwa kuwa ndiye kocha bora katika michuano ya Ligi Kuu ya England.

Hata hivyo pamoja na kuwa atakuwa akikumbukwa kwa mengi, lakini utafiti uliofanyika inaonekana kwamba, pamoja na sifa anazomwagiwa kwa suala la ushindi katika michuano ya Ligi Kuu ya England, yupo nyuma kwa kocha wa zamani wa Chelsea ambaye kwa sasa anainoa timu ya Real Madrid, Jose Mourinho.

Ifuatayo ni orodha ya makocha 10 katika michuano hiyo na asilimia za ushindi walizonazo kwa sasa.

10. Kenny Dalglish - 48%

Nyota huyo wa zamani wa Liverpool, alianza kazi ya ukocha katika klabu hiyo ya Anfield akiwa kocha mchezaji kazi ambayo alidumu nayo kwa muda wa miaka sita kabla ya kustaafu mwaka 1991, baada ya kukusanya makombe 10 katika kipindi cha miaka sita.

Baada ya kuondoka katika timu hiyo, Dalglish alikwenda kuinoa timu ya Blackburn Rovers ambako nako alifanikiwa kutwaa ubingwa wa Ligi Kuu mwaka 1994.

Mwaka 1997, Dalglish aliteuliwa kuwa kocha wa timu ya Newcastle United  ambako alitumia muda wa mwaka mmoja kabla ya kufukuzwa kutoka na matokeo yasiyoridhisha.

Mwisho Kenny alikwenda kuinoa timu ya Celtic, ambayo aliinoa kwa muda wa miaka miwili na kuipa ubingwa Scotland kabla ya kurejea Liverpool katika msimu wa 2011-12.

9. Andre Villas-Boas - 52%

Kabla ya kuanza kufundisha soka, AVB alifanya kazi chini ya makocha vinara kama vile, Sir Bobby Robson na Jose Mourinho.

Villas-Boas aliacha kazi ya kuwa kocha msaidizi katika timu ya FC Porto iliyokuwa chini ya Mourinho, na kisha kwenda katika timu ya Academica ambako alikabidhiwa kibarua cha kuwa kocha mkuu.

Alipokabidhiwa timu hiyo aliweza kuitoa nafasi ya mwisho kwenye msimamo wa ligi ambako timu hiyo ilikuwa haina ushindi na kisha kuiwezesha kushika nafasi ya 11, huku ikiwa na pointi 10 kutoka kwenye mstari wa kushuka daraja. Juni 2010, Andre Villas-Boas alirejea katika timu ya FC. Porto na akiwa na timu hiyo kwa takribani miezi miwili aliweza kuchukua ubingwa wa Kombe la Ureno na tangu aondoke FC  Porto, AVB ameweza kuzifundisha timu za  Chelsea na kwa sasa ndiye anayeinoa  Tottenham.

8. Claudio Ranieri - 52%

Kwa mara ya kwanza, Claudio Ranieri  kutangazwa kuwa kocha ilikuwa ni mnamo mwaka 1986 akiwa na timu ya Lametini.

Hata hivyo baada ya muda wa miaka 14 baadaye alichaguliwa kuwa kocha wa Chelsea. 

Licha ya Ranieri kutotwaa ubingwa wowote akiwa na Blues, lakini alijitengenezea jina nchini England, baada ya kuiongoza timu hiyo kwa mechi 199 na kisha akashinda mechi 107 kati ya hizo kabla ya kwenda kuzifundisha timu za Valencia, Juventus na kwa sasa ndiye kocha mkuu wa timu ya Monaco.

7. Rafael Benitez - 55%

Benitez kwa mara ya kwanza kukabidhiwa kibarua cha ukocha, alianzia katika timu ya  Real Madrid B na kisha kutimkia Liverpool mwaka 2004, baada ya kujiuzulu kuifundisha timu ya Valencia. 

Akiwa Liverpool, Benitez aliweza kutwaa mataji manne, kabla ya mwaka 2010  kukimbilia Internazionale na baadaye  mwaka 2012 akarejea katika soka la Uingereza akiwa kocha wa muda Chelsea.

6. Luiz Felipe Scolari – 56%

Scolari alikabidhiwa kibarua nchini  England Julai 2008, alipochaguliwa kuwa kocha wa Chelsea.

Kocha huyo ndiye wa kwanza kufundisha Ligi Kuu ya England, akiwa ameshawahi  kutwaa ubingwa wa Kombe la Dunia, baada ya kutwaa taji hilo akiwa na Timu ya Taifa  ya Brazil miaka sita nyuma. 

Licha ya kupata mafanikio katika msimu wake wa kwanza, Mbrazil huyo alitimuliwa kabla ya kufikia mwishoni mwa Februari,  2009 baada ya timu hiyo kufanya vibaya.

5. Arsene Wenger - 58%

Hadi sasa Arsene Wenger ni kocha wa Arsenal kwa muda wa miaka 17 na katika kipindi hicho ameiwezesha klabu hiyo ya Kaskazini mwa Jiji la London kutwaa mataji  11 na kati ya mataji hayo mawili aliyapata katika msimu wake wa pili tangu aanze kuinoa timu hiyo, wakati alipotwaa ubingwa wa Ligi Kuu na Kombe la FA.

Licha Arsenal kutofahamika kutwaa ubingwa miaka ya hivi karibuni tangu alipotwaa ubingwa wa Ligi Kuu msimu wa  2003-2004, lakini timu hiyo iliweza kushinda mechi 38 bila kufungwa.

4. Roberto Mancini - 62%

Roberto Mancini aliteuliwa kuwa kocha wa  Manchester City mwaka 2009, ikiwa ni baada ya kufukuzwa aliyekuwa Kocha Mkuu wa timu hiyo, Mark Hughes.

Wakati anakabidhiwa timu hiyo alisaini mkataba wa miaka mitatu na nusu na tangu kipindi hicho ameweza kufikia malengo kwa kutwaa ubingwa wa Ligi Kuu msimu wa  2011-2012.

3. Carlo Ancelotti - 63%

Carlo Ancelotti ndiye aliyechukua nafasi ya Guus Hiddink akiwa kocha mkuu wa  Chelsea FC Juni 2009.

Ikiwa ni takribani miezi miwili tangu, Ancelotti akabidhiwe jukumu hilo aliweza kutwaa taji lake la kwanza wakati timu yake ilipoifunga timu ya Sir Alex Ferguson, Manchester United katika mechi ya kuwania Ngao ya Jamii, baada ya timu hizo kutoka sare ya 2-2 na kulazimu mshindi apatikane kwa mikwaju ya penalti.

Mei 9, 2010, Muitaliano huyo aliweza kuiongoza Blues kutwaa ubingwa wa Ligi Kuu na siku sita, baadaye akaiwezesha kutwaa Ubingwa wa Kombe la FA, baada ya mechi ya fainali kuifunga Portsmouth bao  1-0.

Hata hivyo kwa bahati mbaya kiwango hicho hakikuonekana msimu wa 2010-2011  na Ancelotti ikiwa ni chini ya saa mbili tangu aifunge Everton akafukuzwa kazi.

2. Sir Alex Ferguson - 65%

Ingawa itawashangaza wengi, lakini ukweli ni kwamba Kocha Sir Ferguson siyo bora katika michuano ya Lig Kuu ya England licha ya kuitumikia kwa zaidi ya miaka 39.

Mscotland huyo kwa mara ya kwanza kutua Ligi Kuu ni pale alipokabidhiwa jukumu la kuinoa Manchester United, baada ya kukabidhwa mikoba ya aliyekuwa kocha wa timu hiyo, Ron Atkinson mwaka 1986.

Mashetani hao Wekundu walitwaa taji lao la kwanza chini ya  Ferguson msimu wa 1992-1993 na tangu kipindi hicho timu hiyo haijawahi kuonesha dalili za kushindwa kutwaa taji hilo.

Katika kipindi chote ambacho, Sir Alex ameinoa timu hiyo, ameweza kutwaa ubingwa wa Kombe la FA mara tano, Kombe la Ligi mara nne, Ngao ya Jamii mara 10, Kombe la UEFA mara mbili, UEFA Super Cup mara moja, Kombe la  Intercontinental mara moja, Kombe la Dunia kwa Klabu mara moja na Ubingwa wa Ligi Kuu ya England mara 13.

Hata hivyo pamoja na kutwaa mataji hayo, bado hakuweza kupata asilimia kubwa ya ushindi katika michuano hiyo.

1. Jose Mourinho - 71%

Jose Mourinho (a.k.a, "The Special One") yeye ndiye anayetajwa kuwa kocha bora kwa asilimia za ushindi katika historia ya Ligi Kuu ya England, baada ya kujizolea asilimia 71% .

Mbali na hilo pia ni kocha wa sita wa Chelsea, kuingia katika kumi bora. 

Mourinho alijiunga na Chelsea akitokea FC Porto mwaka 2004.

Mreno huyo aliiwezesha timu hiyo kutwaa ubingwa wa Ligi Kuu msimu wa 2004-2005  na 2005-2006 pamoja na Kombe la Ligi mara moja na Ngao ya Jamii mara moja.

Msimu uliofuata kikosi hicho cha Mourinho, kilishindwa kutwaa ubingwa huo kabla ya msimu wa mwisho kuiongoza klabu hiyo ya Stamford Bridge, kutwaa ubingwa wa Kombe la FA na Kombe la Ligi na kisha Septemba 2007 akaitema klabu

hiyo.

 Mbali na mataji hayo, aliiwezesha Chelsea kutwaa Kombe la FA na Kombe la Ligi  kwa mara ya pili kabla ya kuondoka Septemba 2007.

Mreno huyo hadi sasa ndiye anayetajwa kuwa na rekodi nzuri ya ushindi katika michuano ya ligi hiyo.