TWIGA STARS KWENYE KIBARUA KIGUMU BILA MECHI ZA KIRAFIKI

TIMU za Taifa za soka za wanawake ile ya vijana chini ya umri wa miaka 20, Tanzanite na ile ya wakubwa Twiga Stars, zipo kambini kwa kwa wiki mbili ikiwa ni programu maalum ya kila mwezi ambayo huandaliwa na Kocha Rogasian Kaijage na kutekelezwa na TFF.

Timu hizo zimeweka kambi kwenye hostel za Shirikisho la Soka Tanzania (TFF) na kufanya mazoezi kila siku asubuhi na jioni.

Akizungumza Dar es Salaam jana, Kocha Mkuu wa timu wa timu hizo Kaijage, alisema anafurahi kuona programu yake inatekelezwa japo si kwa kiwango kikubwa kutokana na timu hizo kukosa wafadhili.

“Wachezaji wapo vizuri na wana ari japo tunakosa kambi nzuri kama ilivyo kwa timu za wanaume kutokana na timu hizi kukosa wafadhili japo TFF wanajitahidi kwa upande wake hivyo naomba wadau waone haja ya kuisaidia timu hizi za wanawake,”, alisema Kaijage.

Twiga stars ina kibarua kigumu cha kupeperusha vema bendera ya Taifa kwenye mashindano ya wanawake Afrika yatakayofanyika nchini Congo Brazaville, Septemba mwaka huu na Tanzanite inajiandaa na mchezo wa kutafuta kufuzu fainali za kombe la dunia kwa vijana wa umri huo dhidi ya Zambia mchezo utakaochezwa Julai  mwaka huu.

Kwa mujibu wa CAF, timu zitakazochuana pamoja na Twiga ni wenyeji Congo, Cameroon, Ivory Coast (ambayo imefuzu baada ya Guinea Bissau kujitoa), Ghana, Misri, Nigeria, Afrika ya Kusini na Tanzania

Timu hizo zimefuzu baada ya kupata matokeo yafuatayo: Nigeria 8-0 Mali (1-1- matokeo ya mechi ya kwanza), Tanzania 2-3 Zambia (4-2), Senegal 1-2 Egypt (0-0), Afrika ya Kusini 5-0 Botswana (0-1), Cameroon 2-1 Ethiopia (2-1) na Zimbabwe 2-2 Ghana (1-2).