KAMARA WA YANGA AUMIA MAZOEZI LEO

MCHEZAJI Lansana Kamara anayefanya majaribio kwenye klabu ya Yanga, jana aliumia kifundo cha mguu wa kushoto  katika mazoezi ya asubuhi kwenye uwanja wa Karume.

Kamara ambaye alianza mazoezi pamoja na wenzake aliumia wakati wa zoezi la upigaji mashuti marefu hali iliyomfanya alale chali huku akisikilizia maumivu kabla ya daktari Juma Sufiani  kuja kumganga.

Sufiani alipomfikia alimvua kiatu pamoja na soksi na kumfunga barafu kuzunguka mguu wote huku akiuwekea sapoti kwa kuuweka juu ya koni ili kupata mlalo mlingano .

Alikaa chini ya uangalizi wa daktari kwa dakika 30 lakini hata hivyo hakuweza kuendelea na mazoezi tena.

Akizungumza na waandishi wa habari Kocha Mkuu wa Yanga Hans van Der Pluijm, alisema anashukuru mazoezi yake yanaendelea vizuri na kusema anaweza kumzungumzia Kamara baada ya kucheza mchezo wa kirafiki.

“Natarajia Juni 26 au 27 nitakuwa na mchezo wa kirafiki wa kimataifa dhidi ya Vital O ya Burundi baada ya kucheza michezo miwili ndo naweza kumzungumzia Lansana,” alisema Pluijm.

Kamara ambaye ni raia wa Sierra Leone ni wiki moja imepita  tangu ajiunge kwenye mazoezi ya Yanga akifanya majaribio  na kikosi hicho kusaka nafasi ya kusajiliwa msimu ujao.