TFF KUSHIRIKISHA RITA KUHAKIKI UMRI WA WACHEZAJI COPA COCACOLA

SHIRIKISHO la Mpira wa Miguu Tanzania (TFF) limesema litashirikiana na Wakala wa
Usajili, Ufilisi na Udhamini (RITA) kuhakiki umri wa wachezaji watakaoshiriki mashindano ya Copa Cocacola yanayotarajiwa kuanza kutimua vumbi Desemba 13, mwaka huu jijini Dar es Salaam.

Hatua hiyo imefikiwa ili kukwepa mikoa kudanganya umri kwa wachezaji kwani mwaka huu mashindano yatahusisha wachezaji waliochini ya miaka 15.

Akizungumza jijini leo, Mkurugenzi wa Mashindano wa Shirikisho hilo, Boniface Wambura, alisema kuwa wachezaji watakaobainika kuzidi umri hawataruhusiwa kushiriki katika michuano hiyo inayoshirikisha wachezaji wenye umri chini ya miaka 15. 

Pia alisema kwa mujibu wa Kanuni ya 29 ya michuano kuhusu idadi ya wachezaji, kila timu inatakiwa kuwa na wachezaji wasiozidi 20 na wasiopungua 16 hivyo kila timu inatakiwa kuhakikisha inakuwa na idadi hiyo ya wachezaji, kwani kikanuni wakipungua 16 itaondolewa kwenye mashindano.

 Wambura ameitaka mikoa ya Arusha, Dodoma, Katavi, Kusini Pemba, Kusini Unguja, Mjini Magharibi na Simiyu kuwasilisha usajili wa wachezaji wake kwa ajili ya mashindano ya Taifa ya Copa Coca-Cola 2014 kabla ya Desemba 5 mwaka huu.

Kwa mujibu wa Kamati ya Mashindano ya michuano hiyo, mkoa ambao hautawasilisha usajili wake kwa ajili ya uhakiki wa umri wa wachezaji utakaonza Desemba 10 mwaka huu utaondolewa katika fainali hizo ambazo zitamalizika Desemba 20 mwaka huu.

  

Timu 16 kwa upande wa wavulana zitashiriki katika fainali hizo wakati kwa upande wa wasichana ni timu nane. Mikoa iliyoingiza timu za wasichana kwenye fainali hizo ni Arusha, Dodoma, Ilala, Kinondoni, Mbeya, Mwanza, Temeke na Zanzibar.