MPONGO KUKOSA MECHI LEO KISA ............................

KIPA Juma Mpongo anachezea Seeb ya Muscat, Oman leo analazimika kukosa mchezo kombe la sultan dhidi ya timu ya Oman club baada ya kuumia akiwa mchezoni hali iliyosababisha kuzimia zaidi ya dakika 30 wiki iliyopita.

 

Mpongo aliumia wakati timu yake ikicheza mchezo wa Ligi Kuu dhidi ya Boshar na kukimbizwa hospitali ya Badri Alsamaa and Polyclinic, mchezo ambao ulimalizika kwa sare ya bila kufungana

Akizungumza kwa njia ya mtandao wa kijamii, Mpongo alisema aliumia wakati akiruka kupangua krosi iliyopigwa na wachezaji wa timu pinzani hali iliyosababisha kugongana ndipo akapoteza fahamu na alikuja kuzinduka akiwa hospitali.

“Nilikuwa naruka kuokoa krosi ya wapinzani wetu ndipo tulipogongana na na kilichoendelea sikijui kwani nilipokuja kupata fahamu nilijikuta nimelazwa hospitali”, alisema Mpongo.

Kipa huyo aliyewahi kudakia Yanga, Coastal Union ya Tanga na Ashanti United ya Ilala amesema kabla ya juzi, wiki moja iliyopita aliumia tena kwenye ini wakati wakicheza na Boshar kwenye michuano ya Kombe la Mazda lakini alipofanyiwa vipimo kwa zaidi ya saa nne ilionekana ini halijaumia.

Mpongo anasema ni mara ya kwanza kuzimia akiwa mchezo pia anatarajia kuanza mazoezi madogomadogo kesho pia anawaasa magolikipa wenzake kuwa makini wakati wakicheza mipira ya krosi kwani washambuliaji wajanja hutumia nafasi hiyo kujaribu kuwaumiza.