WATAKAOMFUATA MESUT OZIL ARSENAL HAWA HAPA

DAKIKA za mwisho kabla ya dirisha la usajili kufungwa, Kocha wa Arsenal, Arsene Wenger, alivunja rekodi ya klabu hiyo kwa kutoa pauni milioni 42 ili kupata saini ya kiungo mchezeshaji mwenye kiwango bora duniani, Mesut Ozil.

Nyota huyo wa Ujerumani anayekipiga Real Madrid, alifanya mazungumzo na Wenger asubuhi ya siku ya mwisho ya dirisha la usajili na kukubali kumwaga wino kwenye klabu hiyo ya Emirates. Je, Wenger ataendelea kusajili wachezaji wenye viwango? Ni wachezaji gani watakuwa chaguo lake wakati wa dirisha dogo la usajili Januari mwakani? Wafuatao ni baadhi ya wachezaji ambao Wenger, alikuwa akiwafukuzia au anaweza kuwasaka majira ya baridi

5. Micah Richards, Manchester City

Beki wa Ufaransa, Bacary Sagna, akiwa hadi sasa hajasaini mkataba mpya kwenye klabu hiyo ya Emirates, tayari Wenger anaonekana amepata mtu atakayeziba nafasi yake, mchezaji huyo ni beki wa kulia mwenye umri wa miaka 26 kutoka Man City, Micah Richars. Richards anaweza akawa muhimu kwenye safu ya ulinzi ya Arsenal, kwa uchezaji wake wa kutumia nguvu na kuwa na akili za kuweza kuiongoza safu ya ulinzi ataweza kuwa msaada mkubwa kwa Gunners.

4. Ashley Williams, Swansea City

 Arsenal walifanya mazungumzo na nahodha huyo wa Wales wakati wa msimu wa kiangazi, lakini hawakumaliza mipango ya uhamisho. Ashley Williams, aliweka wazi kuwa anataka kucheza klabu ambayo inashiriki Ligi ya Mabingwa. Ubora wake na uwezo wa kuzoeana na mabeki wenzake, kunamfanya awe chaguo sahihi kuwa beki wa kati wa Gunners, hata katika nafasi ya beki wa kulia.

 

3. Michu, Swansea City

 Mchezaji mwingine kutoka katika klabu ya Swansea City, Michu, ambaye pia alifanya mazungumzo na klabu hiyo ya Kaskazini mwa London. Ni mshambuliaji aliyefanya vizuri msimu uliopita na kupachika mabao 22 katika mechi 43, thamani yake ni pauni milioni 25 kwa mujibu wa klabu yake. Wenger anafikiri kuwa nyota huyo wa Hispania anaweza kuwa msaada katika safu ya ushambulia ya Gunners.

2. Edwin Dzeko, Manchester City

 Nyota huyo wa Bosnia, alikuwa kwenye mpango wa klabu hiyo ya Arsenal wakati wa harakati za usajili majira ya kiangazi. Kocha wa Man City, Manuel Pellegrini, yuko tayari kumuachia, Dzeko aondoke na kumfanya Wenger aingie kichaa cha kumfukuzia. Kutokana na kuwasili kwa wachezaji kama Jovetic na Negredo, ambaye tayari ameanza kuonyesha shughuli katika kupachika mabao ndani ya Etihad, kunamfanya Dzeko akose nafasi na kutoa upenyo kwa Wenger kukamilisha mipango yake ya kumnasa mshambuliaji huyo.

 

1. Luis Suarez, Liverpool

 Bila shaka Luis Suarez, ndiye aliyekuwa chaguo la kwanza la Wenger katika dirisha la usajili la majira ya kiangazi. Nyota huyo wa Uruguay, mwenye umri wa miaka 26, anaonekana kuwa mchezaji sahihi katika safu ya ushambuliaji ya Arsenal. Akichezeshwa pamoja na Ozil wanaweza kufanya mambo ya kushangaza England hata na Ulaya. Lakini ni kitu gani kocha wa Gunners atafanya, kuweza kuwasajili wachezaji wenye vipaji vya hali ya juu na kuifanya klabu hiyo ya kaskazini mwa London kuwa tishio.