SIMBA KILELENI LEO BAADA YA KUIFUNGA JKT MGAMBO 6-0, YANGA YABANWA MBAVU MBEYA

  Golikipa wa Mgambo JKT, Kulwa Manzi akiwa chini baada ya kupishana na mpira uliopigwa na mshambuliaji wa Simba, Amisi Tambwe (kulia) wakati wa mchezo wa Ligi Kuu ya Soka Tanzania Bara uliofanyika leo kwenye Uwanja wa Taifa jijini Dar es Salaam. Simba ilishinda 6-0.

Washambuliaji wa simba, Amisi Tambwe (kulia), na Betram Mombeki wakishangilia ushindi wa timu yao. 

 Haruna Chanongo akimtoka kiungo wa timu ya Mgambo JKT, Salum kipaga. 

 Mashabiki wa Simba.

 Amri Kiemba akiwatoka wachezaji wa Mgambo JKT.

 Hakuna njia hapa.

 Beki wa Mgambo JKT, Bakari Mtama akimiliki m[pira huku akizongwa na mshambuliaji wa simba, amis Tambwe.

Betram Mombeki akiwatoka mabeki wa Mgambo JKT. 

 Wachezaji wa Simba.

Wakifuatilia pambano hilo. 

 Waamuzi wa mchezo huo.

SIMBA raha bwana! Ndivyo unavyoweza kusema, baada ya kuibuka na ushindi wa mabao 6-0 katika mechi ya Ligi Kuu Tanzania Bara, iliyochezwa jana kwenye Uwanja wa Taifa, Dar es Salaam, huku Yanga ikibanwa na Tanzania Prisons baada ya kutoka sare ya bao 1-1, Uwanja wa Sokoine, Mbeya.

Kwa ushindi huo, Simba imeweza kufikisha pointi 10 ikiiengua kileleni JKT Ruvu iliyokuwa ikiongoza kwa pointi tisa ambayo jana ilifungwa na Ruvu Shooting, katika mechi iliyochezwa kwenye Uwanja wa Mabatini, Pwani.

Simba imefikisha pointi hizo, baada ya kushinda mfululizo mechi tatu dhidi ya JKT Oljoro bao 1-0, kisha mabao 2-0 dhidi ya Mtibwa Sugar ambapo ilitoka sare ya mabao 2-2 na Rhino Rangers.

Mechi hiyo iliyochezeshwa na mwamuzi Jacob Adongo, Simba waliandika bao la kwanza  katika dakika ya nne lililofungwa na mshambuliaji wa kimataifa kutoka Burundi, Amisi Tambwe kwa kichwa, baada ya kuunganisha krosi ya beki wa pembeni, Issa Rashid.

Simba ilikosa bao katika dakika ya saba, baada ya Henry Joseph kushindwa kutumia pasi nzuri ya Batrem Mombeki aliyepiga shuti hafifu lililodakwa na Kipa wa Mgambo Shooting, Kulwa Manzi.

 Katika dakika ya 12, Simba ilipoteza nafasi nyingine ya kufunga, baada ya Tambwe kupiga shuti kali ambalo liliwachanganya mabeki wa Mgambo, lakini kipa Manzi aliwahi na kuokoa hatari hiyo.

Mgambo Shooting walifanikiwa kufanya shambulizi zuri dakika ya 20, ambapo Salum Kipaga aliachia shuti kali, lakini alishindwa kufunga ambalo lilitoka sentimeta chache kutoka lango la Simba.

Dakika ya 30, Mombeki alishindwa kuipatia Simba bao la pili, baada ya kupiga shuti kali ambalo lilitoka nje kidogo ya lango la Mgambo Shooting, ambaye alimalizia kazi nzuri iliyofanywa na Rashid.

Simba walipata bao la pili katika dakika ya 32 kupitia kwa Haruna Chanongo baada ya kuwachambua mabeki wa Mgambo Shooting na kufanikiwa kumpiga kanzu Kipa, Kulwa Manzi na mpira kujaa vyavuni.

Tambwe alifunga bao la tatu katika dakika ya 41, baada ya kipa wa Mgambo Shooting,  Manzi kutema shuti la Chanongo na kumkuta mfungaji, ambapo Tambwe alifunga tena dakika ya 44 akimalizia pasi ya mwisho ya Amri Kiemba. 

Hata hivyo, kipa wa Mgambo alifanya kazi ya ziada kuokoa krosi iliyopigwa na Tambwe  ambapo Mombeki alikuwa anaisubiria kwa hamu ili aweze kupachika bao.

Mwamuzi, Adongo alimwonesha kadi ya njano beki wa Simba, Adam Miraji dakika ya 49 baada ya kumchezea rafu winga wa Mgambo Shooting Salum Gila. 

Simba ilipata bao la tano, dakika ya 61, baada ya beki wa Mgambo Shooting, Bakari Mtama kujifunga mwenyewe akiwa katika harakati ya kuokoa krosi iliyochongwa na Chanongo

.

Dakika ya 77, Tambwe alifunga bao la sita kwa Simba kwa njia ya penalti, baada ya Salum Kipanga kuunawa mpira eneo la hatari na Mwamuzi wa mechi hiyo, Adongo kuamuru ilipigwe penalti hiyo.

Baada ya mechi hiyo, Kocha Mkuu wa timu hiyo, alisema matokeo yanatokana na mbinu ambazo amekuwa akiwafundisha wachezaji na anatarajia wataendelea kushinda mechi inayofuata dhidi ya Mbeya City itakayochezwa Jumamosi kwenye uwanja huo.

Kwa upande wa Kocha wa Mgambo Shooting, Mohamed Kampira alimtupia lawama kipa wake, Kulwa Manzi kwa kuruhusu mabao ya kizembe aliyofungwa katika mechi hiyo.

Simba iliwakilishjwa na: Abel Dhaira, Adam Miraji, Issa Rashid, Kaze Gilbert, Joseph Owino, Jonas Mkude, Amri Kiemba, Amisi Tambwe, Henry Joseph,  Batrem Mombeki na Haruna Chanongo.

Mgambo Shooting iliwakilishwa na: Kulwa Manzi, Francis Anyosisye, Salum Mlima, Bakari Mtama, Novat  Lufunga, Salum Kipaga, Nassor Gumbo, Peter Mwalianzi, Mohamed Neto, Fully Maganga na Salum Gila.

YANGA imebanwa tena baada ya kutoka sare ya bao 1-1 na Tanzania Prisons, katika mechi ya Ligi Kuu Tanzania Bara, iliyochezwa kwenye Uwanja wa Sokoine jijini Mbeya.

Yanga ilikuwa ya kwanza kulifikia lango la Tanzania Prisons, ambapo Didier Kavumbagu alikosa bao katika dakika ya tatu baada ya kuwatoka mabeki wa Prisons  na kupiga shuti kali ambalo lilitoka nje.

Mechi hiyo iliyochezeshwa na Simon Mbelwa kutoka Pwani, Prisons ilikosa bao katika dakika ya 19, baada ya Six Ally kushindwa kumalizia krosi ya Laurian Shaban, lakini Kipa wa Yanga, Ally Mustapha aliondoa hatari hiyo.

Katika dakika ya 14, Jeryson Tegete aliifunga Yanga bao la kuongoza baada ya kumalizia krosi ya Simon Msuva kutoka winga ya kulia.

Dakika ya 59 beki wa Prisons, Jimmy Shoji alifanya kazi ya ziada baada kuokoa shuti la Tegete, lililoelekea kuzama langoni mwao.

Yanga ilipoteza nafasi ya kufunga dakika ya 75, baada ya Kavumbagu kuunganisha kwa kichwa mpira uliopigwa na beki wa pembeni wa timu hiyo, Mbuyu Twite, lakini Kipa wa Prisons aliokoa hatari hiyo.

Prisons walisawazisha katika dakika ya 76 kupitia kwa kiungo wa timu hiyo, Michael Petes, baada ya kumalizia kazi nzuri iliyofanywa na Omega Seseme aliyetokea benchi kuchukua nafasi ya Jermia Juma, aliyefunga kwa kichwa. Hata hivyo, Yanga ilipoteza nafasi nyingine ya kufunga baada ya Said Bahanunzi kushindwa kumalizia krosi ya Kavumbagu katika dakika ya 87 akiwa ndani ya eneo la 18.

Baada ya mechi hiyo, mashabiki wa Yanga waliangua kilio kwa madai timu yao inahujumiwa baada ya wiki iliyopita kutoka sare kama hiyo na Mbeya City iliyochezwa kwenye uwanja huo.

Tanzania Prisons: Beni David, Salum Kimenya, Laurian Shaban, Jumanne Elfadhili, Nurdin Issa, Jimmy Shoji/Hamis Rataon, Fredy Chucu, Ibrahim Isaka, Six Ally, Jermia Juma/Omega Seme na Lugano Mwagomba.

Yanga: Ally Mustapha ‘Barthez’, Mbuyu Twite, David Luhende, Nadir Haroub ‘Cannavaro’, Kelvin Yondani, Athuman Idd ‘Chuji’, Simon Msuva/Nizar Khalfan, Salum Telela/Frank Domayo, Didier Kavumbagu, Jeryson Tegete/Said Bahanuzi na Haruna Niyonzima.

Uwsanja wa Chamazi, Azam FC jana iling’ang’aniwa na Ashanti United, baada ya kutoka sare ya bao 1-1.

Mabao ya Azam FC yalifungwa na Kipre Tchetche katika dakika ya 21, ambapo Mwamuzi wa mechi hiyo, Oden Mbaga alimwonesha kadi nyekundu, Aggrey Morris dakika ya 60 kutokana na kumchezea faulo, Hussein Sued. Bao la Ashanti United lilifungwa na Anton Matangalu katika dakika ya 79 lililotokana na mpira wa adhabu ndogo.

MTIBWA Sugar imetoshana nguvu sawa na Mbeya City, baada ya kutoka suluhu katika mechi iliyochezwa kwenye Uwanja wa Manungu, Morogoro.

Huko Kagera timu ya Kagera Sugar, imeonja ushindi baada ya kuifunga JKT Oljoro mabao 2-1 katika mechi iliyochezwa kwenye Uwanja wa Kaitaba mjini Bukoba.

Mabao la Kagera Sugar yalifungwa na Godfrey Wambura dakika ya 25 na Maregesi Mwangwa dakika ya 90, huku bao la JKT Oljoro likifungwa na Shaibu Nayopa dakika ya 35.

Huko Tanga, Coastal Union imeshindwa kuutumia uwanja wao wa nyumbani wa Mkwakwani, Tanga, baada ya kutoka sare ya bao 1-1 na Rhino Rangers.

Bao la kuongoza la Rhino Rangers lilifungwa na Salum Majid katika dakika ya 26, baada ya kutokea piga nikupige langoni mwa Coastal Union.

Bao la Coastal Union, lilisawazishwa na Jery Santo kwa njia ya penalti katika dakika ya 81 iliyotolewa na Mwamuzi, Jacob Zakaria kutoka Pwani, baada ya Saada Kipanga kunawa mpira eneo la hatari.

Nayo RUVU Shooting imeibuka na ushindi wa bao 1-0 dhidi ya JKT Ruvu, katika mechi iliyochezwa kwenye Uwanja wa Mabatini, Pwani.

Bao la Ruvu Shooting, lilifungwa na Stephano Mwasyika dakika ya 37 baada ya kupokea pasi kutoka kwa Cosmas Lewis.