TSONGA AMCHAPA ROGER FEDERER HUKU SERENA AKITINGA FAINALI

PARIS, Ufaransa

MCHEZA tenisi, Jo-Wilfried Tsonga,  amemtupa nje ya michuano ya wazi ya Ufaransa, nyota anayeshika nafasi ya pili kwa ubora, Roger Federer na hivyo kurejesha matumaini kwa nchi yake kutwaa ubingwa wa dunia upande wa wanaume baada ya miaka 30 ya ukame.

Tsonga, ambaye anashika nafasi ya sita kwa ubora, alifufua matumaini hayo juzi, baada ya kumchapa mpinzani wake kwa seti   7-5 6-3 6-3 na hivyo kutinga nusu fainali yake ya kwanza katika michuano hiyo ya  Roland Garros, inayoendelea jijini Paris.
Kwa ushindi huo wa juzi, jana Tsonga alitarajia kumkabili David Ferrer katika hatua ya nusu fainali.

 “Nadhani nilipata ushindani mdogo kiasi kila mahali. Nina masikitiko kidogo kuhusu mechi hii na kwa jinsi nilivyocheza,” alisema Tsonga, mara baada ya mtanange huo.

Serena atinga nusu fainali kwa tabu

 PARIS, Ufaransa

MCHEZA tenisi ambaye anashika nafasi ya kwanza kwa ubora ulimwenguni, Serena Williams, amenusurika kichapo kutoka kwa bingwa wa zamani,  Svetlana Kuznetsova,  baada ya kushinda kwa tabu mechi yake ya robo fainali ya michuano ya wazi ya Ufaransa.

Bingwa huyo wa michuano hiyo ya Roland Garros ya mwaka  2002, ndiye aliyeshinda seti yake ya kwanza kwa urahisi  kabla ya kupoteza zote na kumfanya raia huyo wa Russia kufungwa seti 6-1 3-6 6-3.
"Mechi ilikuwa ni ngumu na nilikuwa nimechoka," alisema Serena, ambaye ni mwanamke wa kwanza raia wa Marekani kutinga hatua ya nusu fainali tangu mwaka 2004, wakati Jennifer Capriati alipotinga hatua hiyo.

"Svetlana amecheza vizuri. Amewahi kutwaa ubingwa wa michuano hii kabla, lakini nina furaha nimefuzu mechi hii na mechi dhidi ya Sara natarajia itakuwa mechi nyingine ngumu, kwani ni mpiganaji mzuri," aliongeza.

Katika mechi nyingine, David Ferrer kutoka Hispania alimuadhibu Mhispania mwenzake,  Tommy Robredo kwa seti  6-2 6-1 6-1 na hivyo kukata tiketi ya kucheza hatua ya nusu fainali kwa mara ya pili mfululizo.

Laura Robson kunolewa na mwalimu wa zamani wa Murray

NYOTA wa mchezo wa tenisi, Laura Robson, ataanza kujifua chini ya kocha wa zamani wa Andy Murray, Miles Maclagan, ili aweze kujiandaa kufanya vyema  katika mashindano mbalimbali.

Kwa  mujibu wa vyanzo vya habari, nyota huyo alitarajia kuanza kibarua hicho jana, huku akiwa na mtazamo wa kumpa mkataba wa kudumu.

Tangu mwezi uliopita,  kinda huyo mwenye umri wa miaka 19 ambaye anashika nafasi ya kwanza kwa ubora nchini Uingereza ametengana na kocha wake raia wa Croatia, Zeljko Krajan.

"Tutaanza kufanya kazi pamoja kwa muda ili tuone jinsi hali itakavyokuwa," Maclagan aliiambia  BBC Radio 5.
Kocha wa zamani wa Timu ya Taifa ya Uingereza mwenye umri wa miaka 38, alimfundisha Murray  kuanzia mwaka 2007  hadi 2010, na tangu kipindi hicho alikuwa akifanya kazi na Mjerumani, Philipp Kohlschreiber na  Cypriot Marcos Baghdatis.


Alipohojiwa atakavyofanya kazi katika ziara za wanawake ikiwa ni mara ya kwanza, Maclagan alisema: "Hii itakuwa changamoto mpya na ndiyo maana tunaanza kwa kufanya kazi kwa majaribio ili tuweze kuona kitakachojitokeza,” alisema  kocha huyo.