KINJE: YANGA WASITARAJIE MTEREMKO

KIUNGO mkabaji wa Simba, Salum Kinje amesema kuwa Yanga wasitegemee mteremko katika mpambano wao wa funga dimba unaotarajiwa kuchezwa Mei 18, katika Uwanja wa Taifa jijini Dar es Salaam.

Akizungumza  jijini Dar es Salaam kabla ya kuondoka Zanzibar, Kinje alisema kuwa licha ya timu yao kuundwa na vijana wengi, lakini wanategemea kuonyesha ushindani wa hali ya juu na kuibuka na ushindi.

“Yanga wanaweza wakaidharau Simba kutokana na timu yetu kuundwa na vijana wengi, lakini wanaweza wasiamini kitakachowatokea siku hiyo kwani Simba inacheza kitimu zaidi kuliko wao,” alisema.

Alisema kuwa baada ya kupoteza ubingwa msimu huu kilichobaki ni kuwafunga Yanga siku hiyo ambapo amewataka mashabiki wa Simba kujitokeza kwa wingi kuishangilia timu yao.

Katika hatua nyingine, alisema kuwa anatarajia kuendelea kuitumikia Simba msimu ujao kwani lengo lake ni kutaka kurudisha heshima yake kwa wapenzi wa timu hiyo ambao hawakuridhishwa na kiwango chake msimu huu.

“Msimu huu haukuwa mzuri kwangu, hivyo nitahakikisha msimu ujao ninafanya kila linalowezekana ili kuwafurahisha mashabiki, bado nina mkataba na Simba hivyo nawaomba waendelee kunipa muda wataona wenyewe.

“Simba walinisajili baada ya kuona kiwango changu kilivyokuwa Kenya, nimekuja hali haikuwa nzuri sana ni kama ilivyo kwa wachezaji wa Ulaya kama Torres alivyokuwa Liverpool alikuwa mzuri, lakini alivyokwenda Chelsea hajaonyesha kiwango kizuri lakini mashabiki wanaendelea kumsapoti,” alisema.