ABDI KASSIM, MCHEZAJI WA KWANZA KUANDIKA HISTORIA ISIYOSAULIKA KWENYE SOKA TANZANIA

KIUNGO mshambuliaji wa Azam, Abdi Kassim 'Babi' ni miongoni mwa wachezaji wanaotarajiwa kuivusha timu hiyo katika michuano ya Kimataifa ya Kombe la Shirikisho barani Afrika, inayoandaliwa na Shirikisho la Soka Afrika (Caf).

Babi aliyeandika historia ya kufunga bao la kwanza kwenye Uwanja mpya wa Taifa, Dar es Salaam katika mchezo wa kirafiki wa kimataifa dhidi ya timu ya Taifa ya Uganda ‘The Cranes’ uliochezwa Septemba Mosi, 2007, wakati ikishinda bao 1-0.

Hata hivyo, amevunja rekodi nyingine baada ya kuifungia Azam bao la kwanza katika mchezo wa Kimataifa dhidi ya Al Nasri ya Sudan Kusini, wakati ikishinda mabao 3-1, uliochezwa Februari mwaka huu, kwenye Uwanja wa Taifa, Dar es Salaam.

Babi ndiye aliyefungua ukurasa mpya kwa timu hiyo kuiwezesha kupata ushindi katika mechi za kimataifa, iliyoanza kushiriki kwa mara ya kwanza katika michuano hiyo mikubwa ngazi ya klabu barani Afrika.

Kutokana na uwezo wake wa kucheza mechi nyingi za kimataifa akiwa na timu kama Mlandege ya Zanzibar, Mtibwa Sugar, Yanga, DT Long ya Vietnam na Taifa Stars, ilimjengea uzoefu mkubwa wa kucheza soka kwa mafanikio.

Hata hivyo, kutokana na umuhimu wake ndani ya kikosi hicho, kiungo huyo anaweza kuwa mchezaji tegemezi katika mchezo wao kesho dhidi ya Barrick Young Controllers ya Liberia utakaochezwa kesho kwenye Uwanja wa Taifa, Dar es Salaam.

Mchango wake unatarajiwa kuonekana kama alivyofanya katika mchezo wa kwanza dhidi ya Al Nasri, iliyotolewa katika michuano hiyo baada ya kufungwa jumla ya mabao 8-1 ikiwa ni baada ya kuibuka na ushindi wa mabao 5-0 ugenini.

Abdi Kassim akipongezwa na wachezaji wenzake baada ya kufunga bao la kwanza kwenye mchezo wa kwanza wa kombe la shirikisho kwa timu ya Azam dhidi ya Al Nasir ya Sudan, uwanja wa Taifa

Katika mchezo uliofuata Azam ilianzia ugenini ambako iliibuka na ushindi wa mabao 2-0, hivyo inahitaji sare ya aina yoyote au ushindi ili iweze kujiweka mazingira bora zaidi ya kusonga mbele katika michuano hiyo.

Babi anasema akipewa nafasi ya kucheza na Kocha Mkuu wa timu hiyo, Stewart Hall atahakikisha anaitumia vizuri, lakini Watanzania wanatakiwa kuwapa hamasa na waondokane na kasumba ya Uyanga na Usimba wa kushangilia timu zao.

Anasema Azam ni timu pekee iliyobakia katika michuano hiyo kwa timu za Afrika Mashariki, baada ya zingine kutolewa katika hatua ya awali.

Historia yake

Alianza kucheza soka akiwa Shule ya Msingi ya Haile Sellasie iliyoko visiwani Zanzibar, wakati huo akiwa na umri wa miaka mitano, lakini soka lilikuwa kwenye damu ya familia yao kutokana na baba yake alikuwa mchezaji wa soka.

 Baadaye alijiunga na timu ya Vikokotoni FC mwaka 1995, iliyokuwa ikishiriki ligi daraja la pili, Zanzibar, lakini soka lake lilianza kung'ara mwaka 1999, baada ya kujiunga na timu ya Mlandege iliyokuwa ikishiriki Ligi Kuu, Zanzibar.

Kama ilivyo kwa wachezaji wengi kila mtu anatafuta maslahi zaidi, Babi aliipiga kisogo timu hiyo na kujiunga na Mtibwa Sugar ya Manungu Turiani Morogoro mwaka 2004, ambaye alidumu kwa miaka mitatu na baadaye kujiunga na Yanga mwaka 2007.

“Yanga ilivutiwa na kiwango changu na uongozi wa klabu hiyo uliamua kunisajili,” anasema Babi.

 Kiungo huyu mwenye nguvu za misuli ya kupiga mashuti makali anasema jina la 'Babi' lilitokana na kaka yake aitwaye Shaban kushindwa kumwita kwa kutamka Abdi na kujikuta akimwita Babi.

Jina la Babi liliendelea kuzoeleka na hadi leo watu wengi wamezoea kuita hivyo.

Babi anasema kamwe hawezi kumsahau  Kocha wa zamani wa Yanga, Simba na timu ya Taifa ‘Taifa Stars’, SylleSaid Mziray (marehemu) ambaye aliwahi kumwita kwenye kikosi cha Stars baada ya kuona kipaji chake akiwa na timu ya Mlandege ya Zanzibar.

Kwa mara ya kwanza aliitwa Taifa Stars 1999 akiwa Mlandege na alidumu kwenye kikosi hicho kwa miaka 13 mfululizo na hakuwahi kuachwa hadi alipokuja Kim Poulsen aliyechukua mikoba ya Jan Poulsen.

Anasema falsafa ya Kim ya soka la vijana ndiyo iliyomfanya atemwe kwenye kikosi cha Stars, japo anaamini bado ana uwezo na nguvu za kuitumikia timu hiyo.

Hata hivyo anasema baada ya kuichezea Yanga miaka mitatu, mwaka 2010 alipata nafasi ya kujiunga na DT Long ya Vietnam, timu ambayo anasema aliunganishiwa na aliyewahi kuwa mshambuliaji wa Simba na Taifa Stars, Danny Mrwanda.

Babi anasema alifanikiwa kucheza mechi 11 na kati ya michezo hizo alifunga mabao saba, mabao manne akifunga kwa mipira ya faulo na matatu kwa mashuti akiwa nje ya eneo la penalti.

Anasema soka ya Vietnam lipo tofauti na Tanzania kwani kila timu inamiliki uwanja wake binafsi vyenye viwango vinavyotambuliwa na Shirikisho la Kimataifa na Soka (Fifa), huku vikiwa vimezungushwa fremu za maduka.

Hata hivyo, anasema waamuzi wa Vietnam ni tofauti na wa kwetu Tanzania, kwani akigundulika amepokea rushwa kwa ajili ya kubeba timu fulani na kupindisha sheria 17 za soka anawekwa rumande.

Babi anasema timu aliyokuwa akichezea ilimfunga mwamuzi miezi sita, kwani ilibainika kupokea rushwa kwenye mchezo wao.

“Chama cha Soka nchini humo, kimejiwekea utaratibu suala la ubingwa ni timu yenye uwezo, ndiyo itakayotwaa ubingwa na ushindani ni mkali tofauti na hapa kwetu unaweza kujua matokeo ya mchezo kabla timu hazijacheza,” alisema Babi.

Anatabainisha kuwa kwenye mishahara Vietnam wanalipa vizuri wapo makini na unaanzia dola 5,000  za Marekani na timu ikishinda kila mchezaji anapata motisha  ya dola 1000 na ikitoka sare walikuwa wanapata dola 100 na ikifungwa hampewi.

Ubaguzi wa rangi ni tatizo la kudumu Vietnam, anasema alisaini mkataba wa miaka miwili kuchezea DT Long, lakini alidumu kwa miezi minane tu, kwani wakiwa katikati ya msimu uongozi ulileta kocha mpya ambaye ni raia wa Ujerumani alikuwa akibagua wachezaji weusi.

Anasema alipoona mazingira magumu aliamua kufanya mawasiliano na uongozi wa Azam, ili aweze kujiunga na timu hiyo.

Alijiunga na timu hiyo katika msimu wa mwaka juzi kwa mkataba wa miaka miwili, lakini anajivunia historia ya kufunga bao katika uzinduzi wa Uwanja wa Taifa, Dar es Salaam.

 Babi anasema alifunga bao hilo kipindi cha pili kwa shuti kali la mguu wa kushoto akiwa mita zipatazo 35.

Abdi Kassim kwenye mchezo dhidi ya Al Nasir ya Sudan

"Nakumbuka pasi alinipa Haruna Moshi 'Boban' nilituliza mpira na kuusogeza mbele kidogo na kupiga shuti kali ambalo lilimshinda kudaka kipa wa The Cranes, ” alisema.

Hata hivyo, anasema ili mchezaji aweze kudumu kwa muda mrefu kwenye timu  anatakiwa anafanya mazoezi kwa kufuata programu ya kocha wake na kuwa programu yake binafsi.

Anasema yeye anatenga muda wa saa moja na dakika 15, kwa ajili ya mazoezi yake binafsi na dakika 30 huzitumia kwa 'sprint' nyingine kuruka kamba na 15 mazoezi ya viungo, kwani mazoezi hayo yanamjengea stamina, kasi na wepesi uwanjani.

Kiungo huyu anasema, Ramadhan Hamsa Kidilu wa Zanzibar, ambaye alichezea Mlandege na Mtibwa Sugar ndiye mchezaji aliyemvutia lakini kwa sasa amestaafu kwani alimwona enzi zake akicheza soka.

Anasema viungo wengi wametawaliwa na papara ndio maana wanaonekana hawana msaada na timu zao ila anasema anamkubali zaidi, Salum Abubakar ‘Sure Boy’ wa Azam lakini si kama ilivyokuwa kwa Kidilu.

 “Salum anajitahidi lakini bado ana kazi kubwa ya kufanya kumfikia Kidilu ambaye alikuwa na vitu vya ziada kuweza kuisaidia timu ikapata matokeo mazuri,” anasema