HATIMAYE CHAMA CHA MAKOCHA CHAPATA UONGOZI MPYA KWENYE UCHAGUZI ULIOFANYIKA

WAJUMBE wa Mkutano Mkuu wa Uchaguzi wa Chama cha Makocha Nchini (TAFCA), wamemchagua kwa kura zote za ndio Oscar Don Koroso kuwa mwenyekiti mpya wa chama hicho.

Akitangaza matokeo hayo jana, Mwenyekiti wa kamati ya uchaguzi ya TAFCA, Ramadhani Mambosasa  alisema mbali na nafasi hiyo ya mwenyekiti, wajumbe wa mkutano huo pia wamempa kura zote za ndio aliyekuwa mgombea wa nafasi ya Makamu Mwenyekiti, Lister Manyara.

Alisema kwa upande wa nafasi Katibu Mkuu alishinda Michael Bundala kwa kupata kura 24 za ndiyo na kura moja ya hapana.

 Nafasi nyingine ni  ya  Katibu Msaidizi ambayo amepita  Gabriel Gunda,  Mweka Hazina aliyeshinda  ni  Dismas Kaonga wote wawili walipata kura zote za ndiyo.

Mwenyekiti huyo alisema aliyechaguliwa katika nafasi ya mwakilishi wa mkutano mkuu wa Shirikisho la soka Tanzania (TFF) ni Kidao Wilfred ambaye naye alipata kura zote za ndiyo.

Nafasi ya wajumbe  wa kamati ya utendaji  wamepita Jemedari Kuzumari, George Komba na Magoma Rugora.