NIGERIA BINGWA WA KOMBE LA AFCON, RAIS JONATHAN AIPONGEZA SUPER EAGLE KUTWAA NDOO YA AFCON

RAIS wa Nigeria, Goodluck Jonathan amekipongeza kikosi cha timu ya taifa ya nchi hiyo maarufu kama Super Eagles kwa kunyakuwa Kombe la Mataifa ya Afrika-Afcon baada ya kuifunga Burkina Faso kwa bao 1-0 katika mchezo wa fainali uliochezwa jana katika Uwanja wa Taifa jijini Johannesburg, Afrika Kusini

 

Katika taarifa iliyotolewa ofisini kwake rais Jonathan alimshukuru kocha Stephen Keshi, wachezaji na viongozi wote ambao walifanya kazi ngumu kuifanya Super Eagles kupata ubingwa wa kujivunia baada ya miaka 19 kupita. Rais pia anaamini kwa ushindi huo waliopata katika Afcon itakuwa chachu ya mafanikio zaidi huko mbele hususani katika michuano ya Kombe la Dunia itakayofanyika nchini Brazil mwakani.

 

Jonathan aliishukuru serikali ya Afrika Kusini na Shirikisho la Soka barani Afrika-CAF kwa maandalizi mazuri ya michuano hiyo na kuahidi kuwaandalia mapokezi makubwa Super Eagles pindi watakapotua jijini Abuja, Jumanne. Bao pekee lililoipa ushindi Super Eagles na kukata kiu yao ya miaka 19 ya kulikosa kombe hilo lilifungwa na mchezaji ambaye anacheza katika timu inayoshiriki Ligi Kuu nchini Nigeria Sunday Mba.

 

Matokeo hayo pia yanamuingiza Keshi katika vitabu vya kumbukumbu akiwa kocha wa pili kushinda kombe hilo akiwa kama mchezaji na baadae kocha, wa kwanza kufanya hivyo alikuwa marehemu Mahmoud El Gohary wa Misri.

Shangwe na furaha: wachezaji wa Nigeria wakinyanyua juu kombe la ubingwa ikiwa ni mara ya tatu kulinyakua katika historia ya fainali hizo.

Nigeria imefanikiwa kuchukua kwa mara ya tatu taji la soka la mataifa ya Afrika baada ya kuifunga Bukina Faso bao 1-0 huku Nigeria ikitawala mchezo wa fainali uliopigwa jijini Johannesburg.

 

Sunday Mba aliifungia Nigeria maarufu kama 'Super Eagles' bao hilo zuri kwa mpira wa kubetua na kuusukumiza wavuni mpira wa kunyunyiza 'volley' zikiwa zimesalia dakika tano kabla ya mapumziko baada ya muda mrefu wa kutafutana kwa tahadhari kubwa, huku pongezi kubwa zikimuangukia kocha mzalendo na nahodha wa zamani wa timu hiyo Stephen Keshi.

 

Sunday Mba akijaribu kuubetua mpira juu ya mlinzi wa Bukina Faso kabla ya kuusukumiza wavuni na kuwa goli pekee lililo ipa ushindi Nigeria. Picha ya chini Mba na wachezaji wengine wa Nigeria wakishangilia baada ya goli kuingia.

Hiyo ilikuwa ni fainali ya kwanza kwa Nigeria tangu mwaka 2000 lakini pia walikuwa wakipewa nafasi kubwa ya kutwaa taji hilo tangu mapema kufuatia rikodi yao ya kucheza michezo 12 bila ya kufungwa.

Kocha wa Nigeria Stephen Keshi akishilia kombe la ubingwa kwa furaha akikumbuka alipolinyakuwa kombe hilo kama mchezaji mwaka 1994.

 

Vincent Enyeama akipaa angani kuunyakuwa mpira licha ya kukabiliwa na Prejuce Nakoulma.

 

Baada ya Nigeria kufanikiwa kutwaa taji hilo, mantiki yake ni kuwa kocha Keshi anakuwa kocha wa pili kushinda taji hilo akiwa mchezaji na pia kama kocha akifuata nyayo za Mahmoud Al Gohari wa Misri.

Mlinda mlango wa Nigeria Vinvent Enyeama akikabiliana na Mady Panandetiguiri.

Victor Moses wa Nigeria akijaribu kuuwahi mpira huku akipata upinzani kutoka kwa Bakary Kone wa Bukina Faso(katikati), Mohamed Koffi (nyuma) na Djakaridja Kone (kulia).

Hii ilikuwa ni mara ya kwanza kwa Burkina Faso kufikia fainali ya michuano hiyo ambapo mwaka 1998 walifanikiwa kutinga hatua ya nufu fainali ambapo walipoteza mchezo huo kwa waliokuwa mabingwa Misri.

Pamoja na kufungwa lakini walionyesha uwezo ambapo katika sehemu ya kiungo Jonathan Pitroipa alionyesha ubunifu mkubwa na kutawala sehemu hiyo.

Itakumbukwa Pitroipa ndiye aliyepewa kadi nyekundu kimakosa katika mchezo wa nusu fainali dhidi ya Ghana.

 

Mlinda mlango wa Burkina Faso Daouda Diakite akizuia hatari kutoka kwa washambuliaji wa Nigeria.

 

Rais wa FIFA Sepp Blatter alikuwepo uwanjani.