TANZANIA,UGANDA ZAKUBALIANA KUONDOA VIKWAZO CHA KIBIASHARA



Serikali za Jamhuri ya Muungano wa Tanzania na Jamhuri ya Uganda zimekubaliana kwa pamoja kuharakisha utatuzi wa vikwazo vyote vya biashara, kupanua masoko ya bidhaa za nchi hizo mbili, na kuboresha miundombinu ya usafirishaji ili kukuza biashara na uwekezaji kwa manufaa ya pande zote mbili.

Makubaliano haya muhimu yamefikiwa leo tarehe 18 Novemba 2026 katika Ikulu ya Entebbe nchini Uganda, wakati Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, alipoanza rasmi Ziara yake ya Kitaifa ya siku mbili nchini humo kufuatia mwaliko wa mwenyeji wake, Rais Yoweri Kaguta Museveni.

Katika mazungumzo yao rasmi, Rais Dkt. Samia Suluhu Hassan amebainisha kuwa Tanzania ipo tayari kushirikiana na Uganda katika mradi wa reli ya kisasa (SGR) utakaounga kutoka Isaka hadi maeneo ya mpakani na Uganda, pamoja na kuendelea kupanua na kuboresha Bandari za Dar es Salaam na Tanga ili kurahisisha usafirishaji wa mizigo katika Ukanda wa Afrika Mashariki.

"Tanzania itaendelea kushirikiana na Uganda kwa moyo wa watu wamoja, hatima moja. Sasa ni wakati wa kuharakisha utekelezaji wa tuliyokubaliana," Rais Dkt. Samia Suluhu Hassan

Rais Dkt. Samia pia ameipongeza Uganda kwa hatua yake ya kihistoria ya kuwa Taifa la kwanza kuanza ujenzi wa ubalozi wake katika Mji wa Serikali jijini Dodoma tangu kuzinduliwa kwa mji huo.

Kwa upande wake, Rais Yoweri Kaguta Museveni amesisitiza umuhimu wa biashara kati ya nchi hizo mbili kuzingatia mahitaji ya pamoja. Akitolea mfano wa mchele wa Tanzania wenye uhitaji mkubwa nchini Uganda na sukari ya Uganda yenye soko kubwa nchini Tanzania, Rais Museveni ameonya dhidi ya hatari ya shinikizo la ndani la kuzuia bidhaa za nchi jirani.

"Tunahitaji maliasili, uzalishaji wa bidhaa, soko la kutosha na mawasiliano," Rais Yoweri Kaguta Museveni

Viongozi hao wawili wamejadili pia maendeleo ya miradi mikubwa ya kimkakati, ukiwemo Mradi wa Bomba la Mafuta Ghafi la Hoima hadi Tanga (EACOP).

Rais Museveni ameeleza kuwa nchi yake inapanga kujenga kiwanda kidogo cha kusafisha mafuta mkoani Hoima, hatua inayoungana mkono na ujenzi wa kiwanda kikubwa zaidi cha kusafisha mafuta kitakachojengwa jijini Tanga, Tanzania.

Taarifa rasmi iliyotolewa na Mkurugenzi wa Mawasiliano ya Rais, Ikulu, Bakari S. Machumu, imesema viongozi wote wawili wamehimiza utekelezaji wa haraka wa makubaliano yote yaliyofikiwa ili kuleta maendeleo ya haraka ya kiuchumi na kijamii kwa wananchi wa Tanzania na Uganda.

 

No comments