MKANDARASI AKAMILISHA AWAMU YA KWANZA YA UVUTAJI WA NYAYA KATIKA MRADI WA CHALINZE–DODOMA

Shirika la Umeme Tanzania (TANESCO) limetangaza kukamilika kwa mafanikio makubwa kwa awamu ya kwanza ya kazi za uvutaji wa nyaya katika eneo la Mkambarani mkoani Morogoro, ikiwa ni hatua muhimu kuelekea ukingoni mwa utekelezaji wa Mradi wa Njia ya Kusafirisha Umeme wa Msongo wa Kilovolti 400 kutoka Chalinze hadi Dodoma ambao kwa sasa umefikia asilimia 94 ya utekelezaji wake wote.

Akizungumza na waandishi wa habari katika eneo hilo la mradi, Kaimu Mkurugenzi wa Mawasiliano na Huduma kwa Wateja wa shirika hilo, Bi. Irene Gowelle, ameeleza kuwa zoezi hilo ambalo lilipangwa kuchukua siku sita limekamilika kwa wakati uliopangwa, hatua iliyowezesha kurejea mara moja kwa huduma ya umeme katika mikoa yote iliyoathiriwa na kuruhusu shughuli za kiuchumi na kijamii kuendelea kama kawaida huku akitoa shukrani za dhati kwa wananchi na wateja wote kwa uvumilivu na ushirikiano mkubwa waliouonesha katika kipindi chote cha utekelezaji.

Akifafanua zaidi kuhusu hatua zinazofuata, Bi. Gowelle amewatahadharisha wananchi kuwa zoezi hilo linaendelea kwenye awamu ya pili itakayojumuisha maeneo ya Kikombo na Mkonze jijini Dodoma kuanzia tarehe kumi na moja hadi tarehe kumi na nne mwezi huu wa Agosti, ambapo shirika litatoa ratiba mapema ili kuwawezesha wananchi kupanga shughuli zao kwa ufasaha sambamba na upatikanaji wa huduma ya umeme katika kipindi hicho cha katizo la muda.

Kwa upande wake, Meneja wa Mradi huo wa kimkakati, Mhandisi Newton Mwakifwamba, amesema kuwa kazi iliyokamilika ya awamu ya kwanza ilihusisha changamoto za kiufundi zilizofanikiwa kuvuta nyaya juu ya reli ya SGR, sambamba na kupitisha nyaya hizo juu ya njia za umeme za msongo wa kilovolti mia mbili na ishirini za Morogoro ya kwanza na ya pili, pamoja na njia ya msongo wa kilovolti mia moja na thelathini na mbili, kazi ambazo zote zinatekelezwa kwa kiwango cha juu cha usalama na ufanisi.

Mhandisi Mwakifwamba ameongeza kuwa awamu ya pili itakayofanyika Kikombo na Mkonze itatekelezwa kwa wakati mmoja ili kuhakikisha wanakamilisha malengo yote ya mradi huu mkubwa unaotarajiwa kuhitimishwa rasmi ifikapo tarehe ishirini na moja Agosti mwaka huu, jambo ambalo litaimarisha kwa kiasi kikubwa uwezo na uthabiti wa Gridi ya Taifa na kuongeza tija kubwa katika usafirishaji wa nishati ya umeme yenye ubora na uhakika nchini kote.