DRFA YAJIVUNIA TUZO YA SAMATTA KUWA MCHEZAJI BORA AFRIKA.

Chama cha soka mkoa wa Dar es salaam DRFA,kimeeleza kufurahishwa kwake na ushindi wa tuzo ya mchezaji bora barani afrika kwa wachezaji wanaocheza ligi za ndani,aliyoipata mtanzania Mbwana Samatta,baada ya kuwabwaga wenzake wawili kwenye kinyang’anyiro hicho,akiwemo mchezaji mwenzake wa TP Mazembe,Kipa Robert Kidiaba pamoja na Mualgeria,Baghdad Boundjah anayeichezea klabu ya Etoile Du Sahel.

Mwenyekiti wa DRFA,Almas Kasongo,amesema kamati yake ya utendaji ilianza kuwa na matumaini makubwa ya Samatta kushinda tuzo hiyo,baada ya kuibuka kuwa mfungaji bora katika michuano ya klabu bingwa Afrika na kuisaidia timu yake ya TP Mazembe kutwaa taji hilo kubwa barani Afrika kwa upande wa vilabu.

Kasongo amesema,tuzo aliyoipata Samatta imechangiwa pia kwa kiasi fulani na usimamizi mzuri wa chama chake cha mkoa kwa vilabu alivyowahi kucheza kabla ya kujiunga na Mazembe,ikiwemo African Lyon na Simba SC,ambavyo vyote maskani yake ni jijini Dar es salaam.

Amesema Samatta ameandika historia ya aina yake kwa kuipeleka Tanzania katika ramani ya soka barani afrika,kwa kuwa tuzo hiyo haijawahi kuletwa na mchezaji yeyote yule kuwahi kutokea hapa nchini.

Kasongo ameongeza kuwa DRFA,itaendelea kuunga mkono juhudi za wachezaji wote wanaojituma kusaka mafanikio ndani na nje ya chini,ikiwa ni pamoja na kuunga mkono juhudi za vyama vingine vya soka vya mikoa katika harakati za kusimamia na kuharakisha maendelea ya mpira wa miguu kwa faida ya taifa zima.