SIMBA NA YANGA KUKUTANA SEPTEMBA 26, MWAKA HUU LIGI KUU

WATANI wa Jadi kwenye soka la Tanzania, Simba na Yanga watacheza Septemba 26, mwaka huu kwenye mchezo wa Ligi Kuu Tanzania Bara.

Akizungumza na waandishi wa habari, Afisa Mkuu wa Bodi ya Ligi,BonifaceWambura, alisema ligi inatarajiwa kuanza Septemba 12 na kumalizika Mei 7, mwakani.

“Ligi yetu itaanza kutimua vumbi kwenye viwanja mbalimbali hapa nchini na imezingatia ratiba ya mashindano ya kimataifa, kombe la TFFambalo litaanza Novemba, uchaguzi mkuu pamoja na ligi daraja la kwanza na imezingatia uwiano wa mechi za nyumbani na ugenini kwa timu zote”, alisema Wambura.

Kwenye ratiba iliyotoka jana, Simba atakuwa mwenyeji wa Yanga mchezo wa raundi ya nne utakaochezwa Uwanja wa Taifa na raundi ya pili watacheza Februari 20, mwakani.

Ligi kuu msimu huu itashirikisha timu 16 ambapo michezo saba itachezwa siku ya ufunguzi katika viwanja tofauti ambapo Ndanda wataikaribisha Mgambo Shooting kwenye uwanja wa Nang’wanda - Mtwara, Simba  watakuwa wageni wa timu ya African Sports kwenye Uwanja wa Mkwakwani – Tanga

Majimajiwataialika JKT Ruvu  Uwanja wa Majimaji - Songea, Azam FC watawaalika maaskari magereza wa Mbeya Tanzania Prisons kwenye Uwanja wa Azam Complex, Dsm, huku Stand United wakiivaa  Mtibwa Sugar  kwenye Uwanja wa Kambarage – Shinyanga.

Wageni Toto Africans na  Mwadui watakuwa kwenye kibarua  cha kuoneshana na nani bora kwenye Uwanja wa CCM Kirumba – Mwanza na Mbeya City wataialika Kagera Sugar kwenye Uwanja wa Sokoine na Septemba 13, Yanga watakuwa wenyeji wa Coastal Union  Uwanja wa Taifa.

Pia Wambura alisema wamekagua viwanja vyote ambavyo vitatumika na kukuta karibu vyote vina mapungufu isipokuwa Azam Complex na Taifa na kuwataarifu wamiliki kuvifanyia marekebisho kabla ligi kuanza.

“Katika timu 16 zinazocheza ligi kuu ni timu nne tu zenye viwanja, ambazo ni JKT Ruvu, Mwadui, Azam FC na Mtibwa  na viwanja vyao havitumiki kwenye michezo inayozihusisha wao na timu za Simba na Yanga kutokana na kuwa na uwezo mdogo wa kubeba mashabiki na usalama pia”, alisema Wambura.

Pia alisema JKT Ruvu watatumia Uwanja wa Karume kama uwanja wao wa nyumbani ila kwenye mechi na Yanga na Simba watalazimika kutumia Uwanja wa Taifa.

Kutokana na mwaka huu kuwa na Uchaguzi Mkuu wamewapelekea wamiliki wa viwanja ambavyo vingi vinamilikiwa na Chama cha Mapinduzi, (CCM) ratiba mapema ili endapo vitakuwa vikitumika kwa kampeni au shughuli nyingine wawataarifu mapema ili wafanye mabadiliko kuliko timu kufika na kushindwa kucheza.

Wambura alimalizia kwa kusema ratiba pia imezingatia haki ya kila mtanzania ya kupiga kura hivyo wamepisha zoezi hilo kufanyika kiswasawa bila kuwepo na mchezo weekend hiyo ya Octoba 25.