TANZANIA YAPEWA TIKETI 260 NA FIFA KWA AJILI YA KOMBE LA DUNIA

SHIRIKISHO la Kimataifa la Mpira wa Miguu (FIFA) limeipa Tanzania mgawo wa tiketi 260 za Fainali za Kombe la Dunia nchini Brazil.

Akizungumza na wandishi wa habari, Ofisa Habari wa Shirikisho la Soka nchini (TFF) Boniface Wambura, alisema kuwa watanzania wanaohitaji tiketi hizo wanatakiwa kutuma maombi TFF kwa maandishi wakielezea aina ya tiketi na mechi wanazotaka kushuhudia.

Pia alisema kuwa hakuna tiketi zitakazoombwa FIFA bila kuwepo maombi kwa maandishi hivyo wanatakiwa kuchangamkia fursa hii mapema kwani kuna uwezekano tiketi zote zilizotengwa kwa Tanzania zisipatikane

Tiketi zilizopo kwa Tanzania ni ifuatavyo; kwa hatua ya makundi (ukiondoa mechi ya ufunguzi), raundi ya 16 bora, robo fainali na mechi ya kutafuta mshindi wa tatu ni 250.

Kwenye mechi ya ufunguzi, nusu fainali mbili na fainali (mechi namba 1, 61, 52 na 64) ni tiketi kumi tu zitakazopatikana na bei za tiketi ziko katika viwango vitatu tofauti.

Mechi ya ufunguzi tiketi zake ni dola za Marekani 495, 330 na 220. Hatua ya makundi (mechi namba 2-48) ni dola 175, 135 na 90. Hatua ya 16 bora (mechi namba 49-56) ni dola 220, 165 na 110.

Robo fainali (mechi namba 57-60) ni dola 330, 220 na 165 wakati nusu fainali (mechi namba 61 na 62) ni dola 660, 440 na 275. Mechi ya mshindi wa tatu ni dola 330, 220 na 165. Kiingilio kwa fainali kitakuwa dola 990, 660 na 440.

Wambura alisema TFF itawasilisha maombi ya tiketi hizo FIFA kuanzia Desemba 8 mwaka huu  hadi Februari 7 mwakani na idadi ambayo itaombwa FIFA itatokana na Watanzania waliowasilisha maombi TFF kwa vile zinaweza zisipatikane tiketi zote hizo zilitengwa kwa Tanzania.