JKT MLALE NA AFRICAN LYON ZATAKATA LIGI DARAJA LA KWANZA

TIMU ya JKT Mlale ya Songea jana iliifunga Kurugenzi ya Njombe bao 1-0 kwenye mchezo wa ligi daraja la kwanza uliochezwa Uwanja wa Majimaji, Ruvuma.

Mchezo huo ambao ulikuwa wa ushindani ulishuhudia timu zote zikienda mapumziko bila kufungana.

Kipindi cha pili JKT Mlale walipoingia walipata bao kupitia kwa Ally Mohamed kunako dakika ya 54 baada ya kuachia shuti kali lililokwenda moja kwa moja wavuni.

Kwenye Uwanja wa Nang’wanda Sijaona Mtwara Villa Scuad walitoka sare ya 0-0 na wenyeji Ndanda.

Uwanja wa CCM Kirumba Mwanza wenyeji Pamba walitoshana nguvu na Polisi Dodoma kwa kufungana mabao 3-3.

Timu ya Africa lyon iliifunga Tesema bao 1-0 kwenye mchezo uliochezwa Uwanja wa Karume jijini Dar es Salaam.

Mjini Shinyanga wenyeji Stand United waliwachezesha kwata maafande wa Polisi Tabora kwa kuwafunga bao 1-0 mchezo uliochezwa Uwanja wa Kambarage.