GALATASARAY YAANZA MAZUNGUMZO NA PRANDELLI.

KLABU ya Galatasaray ya Uturuki, imethibitisha kuwa wameanza mazungumzo na kocha wa zamani wa Italia Cesare Prandelli.

Kocha huyo mwenye umri wa miaka 56 aliachia nafasi yake kama kocha wa timu ya taifa ya Italia baada ya kuenguliwa katika hatua ya makundi ya Kombe la Dunia kwa kupokea vipigo kutoka kwa Uruguay na Costa Rica.

Galatasaray imekuwa katika mawindo ya muda mrefu ya kutafuta kocha mpya kufuatia kuondoka kwa Roberto Mancini baada ya timu hiyo kumaliza katika nafasi ya pili katika msimo wa Ligi Kuu nchini humo. 

Katika taarifa ya klabu hiyo iliyotumwa katika mtandao imedai kuwa wameanza mazungumzo na mashabiki watajulishwa kuhusu maendeleo ya mazungumzo hayo. 

Galatasaray inatarajiwa kushiriki michuano ya Ligi ya Mabingwa Ulaya msimu ujao baada ya Fenerbahce kufungiwa kushiriki michuano yote ya Ulaya.