TUNAWEZA:Wenger anaamini Arsenal itatwaa ubingwa Ligi Kuu England

KOCHA wa Arsenal, Arsene Wenger amedai kwamba klabu yake bado inanafasi ya kushinda taji la Ligi Kuu ya England msimu huu, licha ya kuwa pointi 11 nyuma ya vinara wa ligi hiyo Manchester United, baada ya kutoa sare ya mabao 3-3 dhidi ya Fulham, Jumamosi.

Baada ya matokeo mabovu kwenye wiki za karibuni, Wenger anaamini kwamba kikosi chake kinakuwa kila siku na kinaweza kupambana kuwania taji hilo kubwa zaidi kwenye soka la England, Arsenal kwa sasa wanakamata nafasi ya nane kwenye ligi wakiwa na matokeo mabovu kila kukicha.

Wenger ameendelea kuamini kwamba timu yake inaweza kufanya vizuri msimu huu, licha ya Gunners kushinda mechi moja tu kati ya nne za mwisho, huku beki yao ikiruhusu mabao 14 katika mechi nne za mwisho pekee.

Alipoulizwa kama timu yake inaweza kuibuka na kutoa upinzani kwenye ligi wakati wa mzunguko wa pili wa ligi hiyo, Wenger alijibu. “Ndiyo, kwanini ishindikane,” Wenger alijbu kwa hasira akionekana kukerwa na swali hilo.

“Tumetoka kucheza mechi tatu ngumu, hasa mbili za kwanza,” akimaanisha kichapo cha 2-1 kutoka kwa Man United na sare ya 2-2 kwenye Ligi ya Mabingwa Ulaya dhidi ya Schalke. “Tulilazimika kuinuka baada ya mechi ya United (Man) na tukaenda Ujerumani kujitoa mpaka mwisho.

Wenger alisema kwamba watu wote kwenye timu wamesikitishwa na matokeo ya mechi ya Fulham kwa sababu timu ilitengeneza nafasi nyingi na kushindwa kuzitumia na hatimaye wakajikuta wanapata sare, lakini alisema kuna mengi mazuri ambayo aliyaona kwenye mechi hiyo na kudai kwamba timu ilicheza vizuri sana kitu kilichamfanya aendelee kuiamini timu hiyo.

Kitu kikubwa ambacho kilimfurahisha Wenger kwenye mechi hiyo ni kiwango kilichoonyeshwa na mshambuliaji Olivier Giroud ambaye alifunga mabao mawili kwenye mechi hiyo.