MZUMBE YATWAA KOMBE LA POOL TABLE KWA VYUO VIKUU VYA MOROGORO

WANAFUNZI wa Chuo Kikuu cha Mzumbe mjini Morogoro, juzi wameibuka mabingwa wa mashindano ya pool yanayoshirikisha Vyuo vya Elimu ya Juu na kudhaminiwa na Kampuni ya Bia Tanzania (TBL), kupitia bia yake ya Safari Lager, baada ya kuifunga Chuo cha Ardhi magoli 13-9 kwenye Ukumbi wa Vijana.

Kwa ushindi huo, Mzumbe walijinyakulia Sh 500,000 huku Ardhi wakipata Sh 300,000 kwa kuwa mshindi wapili na Chuo cha Uandishi wa Habari Morogoro (MSJ), kikishika nafasi ya tatu na kupata Sh 200,000, Chuo cha SUA wakishika nafasi ya nne na kupata Sh 100,000.

Kwa Upande wa nafasi ya mtu mmoja mmoja wanaume, George Tito kutoka SUA  aliibuka kidedea na kutwaa nafasi ya ubingwa wa mkoa baada ya  kumshinda mpinzani wake Kiloya Kafuna kutoka Chuo cha Mzumbe kwa magoli 3-2 na kujipatia Sh 150,000.

Kwa upande wa  wanawake Salome Eliudi, kutoka Chuo cha Mzumbe alishiaka nafasi ya kwanza na kupata Sh 100,000 baada ya kuwashinda wenzake wawili aliokuwa akichuana nao.

Hivyo mshindi wa kwanza wa timu katika shindano hilo, atapata fursa ya kushiriki mashindano hayo ngazi ya Taifa  na mtu mmoja mmoja upande wa wanaume atauwakilisha mkoa kwenye michuano hiyo inayotarajia kufanyika mwezi ujao ujao jijini Dar es Salaam.

Akizungumza wakati wa mashindano hayo, Naibu Meya wa Manispaa ya Morogoro, Lidya Mbiaji, aliwataka wanafunzi hao kuzingatia masomo kwanza ndiyo michezo ifuate.

Aliwataka viongozi wa mchezo huo mkoani hapa na maeneo mengine, kutenga muda maalumu wa kucheza mchezo huo, ili kutoa nafasi ya kufanya shughuli nyingine za kimaendeleo, badala ya kuundesha  kwa nyakati zote kama ilivyo sasa.